Kampaña Kandidatu independente ba Prezidente Repúblika (PR), Hermes Barros ‘Cikiliras Aihai’, iha Kampu Ladi, Suai. Imajen Tatoli/Anito Soares.

COVALIMA, 03 marsu 2022 (TATOLI) – Kandidatu independente ba Prezidente Repúblika (PR), Hermes Barros ‘Cikiliras Aihai’, hakarak promove Timor-Leste ba investidór estranjeiru atubele investe iha país bainhira hetan fiar ba ukun.  

“Hau-nian vizaun mak hamutuk ho timoroan hotu harii Timór ida ne’ebé nabilan ba timoroan sira hotu. Vizaun ida ne’e hakerek ona iha Xefe Estadu ninia kompeténsia rasik ne’ebé prevista iha Konstituisaun”, nia afirma iha kampaña daruak, iha kampu Ladi, Suai Vila, Covalima.

“Eleitu ba Xefe Estadu tenke bá iha rai-li’ur ho objetivu mak promove no hadi’ak imajen Timor-Leste nian no promove ba ema estranjeiru atu investe iha país”.

Nia lamenta mós ho embaixador timoroan barak iha rai-li’ur ne’ebé la halo negosiasaun ho nasaun sira seluk atu halo investimentu iha país hodi bele emprega timoroan sira.

Sai PR tenke garante paz no estabilidade ba rai ida ne’e. Presta atensaun ba soberania hahán iha rai-laran. “Se Governu mak laiha polítika ida di’ak ba programa sira, liuliu soberania ai-han, sei uza ha’u-nian kompeténsia nu’udar Xefe Estadu hodi lahalo promulgasaun [ba orsamentu]”, tenik.

Kandidatu ne’e sei tau atensaun másima ba programa Governu nian liuhusi Orsamentu Jerál Estadu (OJE) ba iha infraestrutura, prinsipalmente hadi’ak estrada sira bá aldeia, suku, postu no nasionál.

Hermes Barros promete katak sei harii uma-du’ut ida iha Palásiu Presidensiál hodi funsiona hanesan fatin ida atu hasoru, iha kada sesta-feira, ho povu atu rona preokupasaun liga ba nesesidade, estrada no seluk tan.

“Ha’u-nian planu importante seluk mak hasai saláriu funsionáriu públiku sira, PNTL, F-FDTL atu oferese sira-nian an ho di’ak ba rai no povu”, realsa.

Hermes salienta katak tratamentu ba ema ho difisiénsia husi Estadu “ladún di’ak no kuandu sai Xefe Estadu apoia sira hodi bele hetan tratamentu ida dignu”.

Kandidatu ne’e akresenta tempu ona ba timoroan hotu atu determina ninia an rasik, “nune’e mak husu atu vota ba númeru 2 hodi fó resposta ba preokupasaun povu nian”.

“Imi fiar katak jerasaun foun sei halo buat foun ba rai ida ne’e. Kandidata an ba Xefe Estadu tanba iha kompromisu, la’ós halo promesa oioin”, konklui.

Kampaña kandidatu ne’e iha loron daruak kumpre regra husi órgaun eleitorál sira.

Observadór internasionál no nasionál sira husi organizasaun oioin mós supervizona atividade refere. Polísia Nasionál Timor-Leste kontinua asegura militante no simpatizante sira iha eventu ne’e.

Tuir observasaun kampaña ne’e la marka prezensa husi labarik sira.

Notísia relevante: Kandidatu PR Hermes Barros husu veteranu kuda prinsípiu patriotizmu ba joven sira

Jornalista: Domingos Piedade Freitas

Editora: Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here