Kandidatu Prezidente Repúblika períodu 2022-2027, Hermes da Rosa Correia Barros. Imajen Tatoli/Celestina Teles.

COVALIMA, 03 marsu 2022 (TATOLI)–Kandidatura Prezidente Repúblika períodu 2022-2027 ho númeru sorteiu rua (2), Hermes da Rosa Correia Barros “Sikiliras Aihai” husu  ba   veteranu sira kuda metin ideolojia patriotizmu no nasionalizmu ba joven sira, tanba joven mak futuru ba nasaun.

“Ha’u-nia mensajen kuda metin ideolojia patriotizmu no nasionalizmu ba rai ida-ne’e, hodi halekar ba juventude iha timor katak responsabilidade ba rai ida-ne’e, pás no estabilidade tenke mai hosi prinsípiu ukun rasik an tanba loron ohin ita  selebra loron nasionál veteran,” Hermes Barros hateten ba Agênsia Tatoli, hafoin realiza kampaña ho tipu aberta, iha Kampu Ladi, Covalima. kinta ne’e

Iha ámbitu loron nasionál veteranu ne’e, nia mós hato’o parabens no veteranu sira atu labele tuur nonook iha fatin maibé tun ba baze hodi hanorin no kuda metin prinsípiu ukun rasik an, patriotizmu no nasionalizmu ba joven sira.

“Ha’u hanesan kadidatura hato’o parebéns ba veteranu sira keta tuur nonook iha uma, tun ba baze hodi hanorin joven sira kona-ba prinsípiu ukun rasik an, patriortizmu no nasionalizmu. Tenke kuda metin futuru ba rai ida-ne’e, joven sira mak atu kontinua, ita kuda agora nune’e ba futuru labele hamosu obstakulu,” nia dehan.

Maske Governu deside loron 03 fulan-marsu hanesan loron nasionál veteran, nune’e kadidatura realiza kampaña iha loron refere mós hanesan hola parte hodi kontinua veteranu sira-nia mehi ne’ebé tuir prinsípiu ne’ebé sira kuda to’o ohin loron tanba ne’e tenke orgullu.

“Ohin ha’u orgulo maske loron veteranu ha’u realiza kampañia iha ne’e atu nafatin kontinua veteranu sira-nia mehi no prinsípiu nasionalizmu ne’ebé sira kuda iha luta a ukun rasik an to’o ohin loron. Ba future, ha’u nia esperiénsia no matenek ne’ebé ha’u iha, ha’u kuda hela ba ha’u-nia alin sira, iha rai Suai atu hatete ukun rasik an nia firme to’o rohan laek,” nia dehan.

Kandidatu independente ne’e nia prezensa iha Covalima hodi realiza kampaña aberta hodi fahe matenek ba joven sira atu kontinua veteranu sira-nia prinsipiu atu lori Timor sai nabilan.

Antes ne’e, Konsellu Ministru ofisialmente deside loron 3 fulan-marsu sai loron nasionál veteranu, iha 17 abril 2015.

Konsellu Kombatente Libertasaun Nasionál harii iha tinan 2011, bainhira Parlamentu Nasionál aprova tiha alterasaun ba lei númeru 2/2002, loron 23 fulan-marsu. Número 3 husi artigu 35, Lei ida ne’e nian define katak estrutura Konsellu Kombatente Libertasaun Nasionál define ona ho Dekretu-Lei, liuhosi konsulta ho organizasaun hirak ne’ebé reprezenta Kombatente Libertasaun Nasionál nian sira.

Tanba ne’e, Dekretu-Lei ne’e aprova ona hosi Konsellu Ministrus hodi konfere ho Kombatente sira knar determinante ida iha promosaun dezenvolvimentu sustentável Timor-Leste nian, iha pás no estabilidade sosiál nasaun nian.

Ho intensaun hodi hanoin loron 3 fulan-marsu tinan 1981, loron hahú organiza fali rezisténsia iha periódu ne’ebé mak defísil liuhosi istória Luta Libertasaun Nasionál nian, ne’ebé deside ona hodi konsidera loron ne’e hanesan Loron Nasionál Veteranu sira-nian.

Biografia

Hermes da Rosa Correia Barros “Sikiliras Aihai” nu’udar timor-oan ida hosi jerasaun otas foun ne’ebé iha hanoin di’ak no mehi ida ba povu no nasaun atu moris iha dame no no unidade. Hermes moris iha Ainaro 24 maiu 1972 hosi familia simplis, hosi inan-aman Benedito Barros no Alcina Correia.

Hermes ho nia maun alin hamutuk na’in-sia (9). Iha tinan 1982 to’o 1989, hahu nia studu iha kolejiu misaun katólika iha munisípiu Ainaro no iha tinan 1989 to’o 1991, nia ramata nia eskola sekundária iha São Pedro Comoro Dili. Iha tinan 1991 to’o 1994, Hermes hala’o nia estudu lideransa iha Jawa-Indonézia, no nia konsege lidera postu administrativu Laclo (Manatuto) hanesan administradór iha tempu okupasaun Indonézia nian. Iha tempu ukun rasik-an, Hermes kontinua nia estudu iha Universidade da Paz (UNPAZ).

Kontribuisaun iha luta ba libertasaun nasionál

“Sikiliras Aihai” naran kodigu ba luta libertasaun nian ke hanesan membru klandestina ida iha tempu resisténsia halo kolaborasaun servisu sekretu sira ho responsavél kolaboradór rede klandestina sira hahú hosi 1987 to’o Timor-Leste hetan nia ukun rasik-an.

Hermes mós sai hanesan membru permanente forsa Repetil iha tinan 1998 no pesoál inportante ba kampaña CNRT iha konsulta popular (referendu) ba ukun rasik-an nian iha territórriu Timor-Leste.

Hermes Barros iha tinan 2007 to’o 2011 haknar-an hanesan membru Parlamentu Nasionál iha segundu legislatura hosi Partidu Demokratiku Sosiál hodi ko’alia defende povu nia interese iha tempu ne’ebá. Hermes kontinua servi Estadu liuhosi nia knar sira iha Governo hanesan Diretór Jerál iha Ministériu Ekonomia nomós hanesan Diretór Jerál iha Ministériu Estatál kuaje tinan balun iha nia lideransa sempre hatudu nia kapasidade lideransa nian ba nia funsionáriu sira iha servisu hodi servi povu no nasaun ho fuan no domin.

“Sikiliras Aihai” jerasaun foun ida-ne’ebé defende joven no povu sira-nia direitu iha tempu sira krusiál nian, hanesan administrador Postu Laklo, Hermes uza nia kna’ar hodi halo inpedementu ba movimentasaun hosi grupu milisia sira husi Baucau, Lospalos, Viqueque atu ba Dili hodi halo asaun brutalizmu hasoru maluk independista sira maibé lakonsege tanba hetan blokeia husi lideransa “Sikiliras Aihai” ne’ebé organiza joven sira halo asaun blokeia ba Estrada hodi impede sira-nia movimentu ba Dili

Iha situasaun ne’e, Hermes hetan kedas xamada hosi Administrador Munisipiu no groupu milisia sira buka tuir Hermes atu oho. Maibé, ho Maromak no Matebian sira-nia tulun la konsege sees hosi milísia sira-nia brutalizmu, nune’e Hermes fila ba dili hasoru Governador tempu ne’ebá hodi hato’o nia autodefeza kona-ba asaun ne’ebé mak Hermes nu’udar Administrador Postu, nune’e atu salva de’it maluk timor-oan sira seluk iha Dili atu labele hetan susar husi aktu milisia sira-nian. Hermes da Rosa Correia Barros “Sikiliras Aihai” nian, ho orgullu no onra bo’ot hakarak afirma nia kandidatura ba Prezidente Repúblika Demokratika Timor-Leste ba mandatu 2022-2027.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here