Portavóz Konferénsia Episkopál Timorense (CET, sigla portugés) no Prezidente Ezekutivu Justisa Paz no Integridade Kriasaun, Padre Júlio Crispin. Imajen TATOLI/Egas Cristóvão

DILI, 01 marsu 2022 (TATOLI)—Portavóz Konferénsia Episkopál Timorense (CET, sigla portugés) no Prezidente Ezekutivu Justisa Paz no Integridade Kriasaun (JPIC, sigla portugés), Padre Júlio Crispin, husu ba Kandidatu Prezidente Repúblika (PR) na’in-16, durante tempu kampaña polítiku labele uza símbolu no atributu igreja.

“Konferénsia Episkopál Timorense fó sai uluk ona, atu labele uza símbolu no dokumentu ruma liga ho igreja. Tanba Uma-kreda nia pozisaun imparsiál, la a-favór ba kandidatu ida, husik ita hotu hanesan sidadaun hala’o dever síviku tuir konsiénsia no tuir mellor eskolla ba líder ne’ebé di’ak liu ba rai ida-ne’e atu ukun ita ba períodu tinan-lima oin mai,” Padre Júlio Crispin, hateten iha edifísiu CET, Balide, tersa ne’e.

Notísia relevante: CNE husu kandidatu PR atu labele insulta malu iha tempu kampaña

Nia konsidera, Kandidatu PR hotu iha liberdade atubele uza meiu instrumentu ne’ebé mak disponível iha sosiedade no iha vida polítika, maibé proibidu atu uza patrimóniu Uma-kreda ninian.

Kona-ba kalendáriu kampaña Prezidensiál ne’ebé monu iha loron kuarezma, liuliu iha loron sinza, Amu ne’e husu ba sarani-sira labele haluha hala’o nafatin vida sarani, mak hala’o fali dever síviku nu’udár sidadaun, tuir kampaña atubele rona programa polítiku sira hosi Kandidatu PR sira.

“Kona-ba partisipasaun Amu sira iha kampaña, hanesan hetan konvite nu’udár sidadaun atu rona Kandidatu Prezidente Repúblika sira-nia programa laiha problema, igreja bandu mak kualkér Amu partisipa iha kampaña labele reprezenta Pároku sira-nia naran ka lori fali sarani sira-nia naran ba apoiu Kandidatu Prezidente Repúblika sira,” Padre Crispin fó hanoin.

Bazeia ba kalendáriu ne’ebé fó sai ona, kampaña Prezidensiál sei realiza durante semana rua, hahú loron 02 to’o 16 marsu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here