Universidade Nasionál Timor-Lorosa’e (UNTL). Imajen TATOLI/Francisco Sony

DILI, 14 janeiru 2022 (TATOLI)—Ministériu Finansa (MF) halo ona transferénsia osan ho montante $5.428.394 ba konta bankária universidade 18 atu kontinua halo pagamentu inzesaun propina faze daruak ba estudante hamutuk 66.106.

Inspetór Jerál Ministériu Ensinu Superior Siénsia no Kultura (MESSK), Higino Alves, hateten, orsamentu ne’ebé transfere ona sei ezekuta tuir ida-idak ninia sistema rasik.

“Ita hotu hatene instituisaun ensinu superiór públiku no privadu sira ne’e iha sistema autónomu ba estabelesimentu ensinu superiór rasik, ne’ebé balun ezame hotu ona bele kontinua kedan ho pagamentu balun seidauk ezame hotu bele hein lai,” Inspetór Jerál hateten ba Agência TATOLI, iha ninia knaar fatin, edifísiu MESSK Colmera, sesta ne’e.

Notísia relevante: MESSK sei submete lista benefisiáriu inzensaun propina ba MF

Bazeia ba diploma ministeriál, bainhira orsamentu inzesaun propina kuandu tama ona ba konta bankária universidade, prosesu hahú la’o ona.

“Signifika prosesu pagamentu propina ba estudante sira iha tempu to’o loron-90 (fulan-tolu) hodi halo prosesu reembolsa ba pagamentu, hafoin aumenta tan loron-15 hodi prepara relatóriu,” nia akresenta.

Maibé, bazeia ba diploma ministeriál ne’e, ekipa kontinua halo monitorizasaun hodi akompaña prosesu ezekusaun pagamentu ba estudante la’o to’o persentajen hira, hafoin mak kontinua fiskalizasaun hodi haree estudante hira mak sai benefisiáriu.

Enkuantu, dadus pagamentu inzensaun propina entre semester in-par no semester par diferente, ne’ebé hosi semester in-par totál estudante iha universidade 18 ne’e hamutuk 64.589, enkuantu ba semester par nian, bainhira atu halo pagamentu propina faze daruak iha aumentu estudante 1.517 sai 66.106.

“Dadus aumenta iha semester par ne’e mai hosi númeru estudante Universidade Nasionál Timor-Lorosa’e (UNTL) ho totál 27.438, kompara ho pagamentu faze dahuluk iha de’it 23.500. Nune’e mós orsamentu inzesaun propina faze daruak mós iha diferensa,” Inspetór Jerál esplika.

Notísia relevante: UNTL seidauk submete relatóriu inzensaun propina faze dahuluk ba MESSK

Hosi faze dahuluk, totál orsamentu ne’ebé MF transfere ba konta bankária universitáriu nian hamutuk $5.627.537,50, maibé iha semester par ne’e kontinua transfere ho totál orsamentu $5.428.394.

Entretantu, pagamentu inzesaun propina tinan 2022 ba faze daruak, UNTL iha estudante 27.438 ho totál subsídiu $808.395, Universidade da Paz (UNPAZ) iha estudante 9.167 ho totál subsídiu $1.152.835, Universidade Orientál (UNITAL) iha estudante 8.054 ho totál subsídiu $603.165, Universidade Dili (UNDIL) iha estudante 3.902 ho subsídiu $439.640.

Nune’e mós, Institute of Bussiness (IOB) iha estudante 4.361 ho totál subsídiu $618.580, Dili Institute of Technology (DIT) iha estudante 3.775 ho totál subsídiu $552.726, Institutu Superiór Cristal (ISC) iha estudante 3.545 ho totál subsídiu $382.200, East Timor Coffee Institute  (ETCI) iha estudante 1.130 ho totál subsídiu $125.800.

Institutu Superiór Filozofia no Teolojia  (ISFIT) D. Jaime Garcia Goulart Fatumeta iha estudante 436 ho totál subsídiu $62.984, Institutu Politékniku Betano (IPB) iha estudante 368 ho totál subsídiu $7.824, Instituto Profissional de Canossa (IPDC) iha estudante 303 ho totál subsídiu $45.450, Instituto Católico de Formação de Professores (ICFP) iha estudante 279 ho totál subsídiu 41.580, Instituto São João de Brito (ISJB) iha estudante 306 ho totál subsídiu $45.900.

Instituto Ciência Religiosa (ICR) iha estudante 250 ho totál subsídiu $35.000,  Instituto Filosófico de São Francisco de Sales  (IFFS) iha estudante 108 ho totál subsídiu $16.200, João Saldanha University (JSU) iha estudante 56 ho totál subsídiu $8.400, no Institutu Boaventura Timor-Leste (IBTL) iha estudante 80 ho totál subsídiu $6.000.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here