Centro Nacional Chega (CNC) hamutuk ho Asosiasaun Vítima Konflitu Pasadu 1974 no 1999, entrega xave “Uma Memória Esperansa” ba sobrevivente iha Nahaek. Imajen Tatoli/Nelia Fernandes.

DILI, 01 marsu 2022 (TATOLI)—Centro Nacional Chega (CNC) hamutuk ho Asosiasaun Vítima Konflitu Pasadu 1974 no 1999, tersa ne’e, entrega xave “Uma Memória Esperansa” ba sobrevivente iha aldeia Nahaek, suku Dare, postu administrativu Vera Cruz, munisípiu Dili.

Notísia Relevante: CNC lansa fatuk dahuluk konstrusaun “Uma Ba Memória Esperansa” iha Nahaek

Diretór Ezekutivu Centro Nacional Chega (CNC), Hugo Maria Fernandes, hateten iha tinan kotuk tuir Orsamentu Jerál Estadu 2021 CNC aloka osan atu harii “Uma Memória ba Esperansa” ne’ebé CNC halo parseria ho Asosiasaun Vítima Konflitu Polítiku, liu-liu harii uma ba sobrevivente sira hosi konflitu pasadu ne’ebé sira-nia kondisaun fíziku defisiente tanba rezulta hosi sofrimentu violasaun direitu umanu ne’ebé uluk militar Indonézia sira halo ba sira.

Diretór Ezekutivu Centro Nacional Chega (CNC), Hugo Maria Fernandes, tesi fita hafoin entrega xave “Uma Memória Esperansa” ba sobrevivente. Imajen Tatoli/Nelia Fernandes.

“Iha tinan ne’e hosi uma 10 ne’ebé mak CNC konstrui, hanesan uma ida dahuluk iha Maubara ne’ebé ita-nia Primeiru-Ministru rasik inaugura ona. Entaun, ohin iha loron 01 marsu ne’e, ita entrega xave, tanba simbolikamente Primeiru-Ministru inaugura ona iha fulan hirak liubá. Tanba ne’e ohin entrega xave ba sobrevivente Duarte ho nia família, nu’udar sobrevivente hosi levantamentu Marabia iha 1980,” Hugo Maria Fernandes hateten ba jornalista sira, hafoin entrega xave “Uma Memória Esperansa” ba sobrevivente Duarte ho nia familia, iha aldeia Nahaek.

Tuir nia, Uma Memória Esperansa ne’e konstrui ho intensaun atu dignifika sobrevivente no vítima sira-ne’ebé mak durante iha tempu okupasaun Indonézia sai vítima hosi membru militár Indonézia nia hahalok.

Seluk fali, nia dehan, nu’udar komponente importante ida hosi reparasaun ba vítima sira, tanba Centro Nacional Chega (CNC) nu’udar Institutu Públiku ida-ne’ebé responsavél atu tau matan ba sobrevivente sira.

“Ita harii uma ida-ne’e sai nu’udar modelu reparasaun ida ba sobrevivente sira. Importante liu, hosi prosesu harii uma ida-ne’e mak solidaridade hosi komunidade sobrevivente sira iha aldeia Nahaek, suku Dare ne’ebé kontribui hodi apoia ba harii uma ne’e. Tanbá uma ida-ne’e, nu’udar jestu oinsa Estadu liuhosi CNC nomós liuhosi Orsamentu Jerál Estadu hatudu nia solidaridade no rekoñesimentu ba sobrevivente sira hosi ita-nia memória pasada,” nia esplika.

Uma Memória Esperansa ba sobrevivente ne’e lansa ba daruak nian, tanba lansamentu dahuluk realiza ona iha Maubara, nune’e iha fulan ne’e CNC sei kompleta tan uma ualu (8), tanba sei iha uma 10 mak CNC sei harii ho orsamentu 2021.

Xefe Aldeia Nahaek, Agusto Soares, hateten nia sente kontente ho programa Governu liuhosi Centro Nacional Chega (CNC) ne’ebé harii ona uma ba nia komunidade iha aldeia Nahaek.

“Ha’u sente kontente tebes, tanba ho uma ida-ne’ebé mak oferese ona ba ha’u-nia komunidade ne’e foin primeira vez mak iha Nahaek foin hetan hanesan ne’e,” nia dehan.

Benefisiáriu ba Uma Memória Esperansa, sobrevivente Duarte Agostu da Silva nia espoza, Luisa de Fatima Sousa, hateten nia parte sente kontente no agradese tanba Governu liuhosi CNC fó ona apoia hodi harii uma ba nia ho nia familia.

“Ami sente kontente tebes, tanba Governu ajuda ajuda ona uma ne’e mai ami, tanba ne’e ami kbiit laek sira fó agradese tebes ba Governu,” nia dehan.

Uma Memória Esperansa ne’e ho nia medida 7×9, kuartu tolu (3), haris fatin ida (1), sala vizita no uma oin iha varanda no kompleta mós ho dapur ida (1).

Entretantu, partisipante iha serimónia entrega xave “Uma Memória Esperansa” ba sobrevivente iha aldeia Nahaek, mak Diretór Ezekutivu CNC, Hugo Maria Fernandes, Koordenadór Ezekutivu Sekretáriadu Nasionál Asosiasaun Vítima Konflitu Pasadu 1974 no 1999, Domingos Pinto de Araujo, Xefe Aldeia Nahaek, komunidade Nahaek no sira seluk.

Notísia Relevante: 2022, CNC sei harii Uma Memória Esperansa lima ba sobrevivente sira

Jornalista  : Nelia Fernandes

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here