Centru Nacionál Chega (CNC), hala'o lansamentu fatuk dahuluk konstrusaun Uma Ba Memoria Esperansa ba vitima sobrevibente levantamentu Marabia 10 Juiñu 1980, Agostu da Silva, iha suku Nahaek, segunda (11/10). Imajen Tatoli/Francisco Sony.

DILI, 11 outubru 2021 (TATOLI)—Centro Nacional Chega (CNC) segunda ne’e lansa fatuk dahuluk konstrusaun ‘Uma Ba Memória Esperansa’ ba sobrevivente iha aldeia Nahaek, suku Dare, postu administrativu Vera Cruz, Munisípiu Dili.

Diretór Ezekutivu Centro Nacional Chega (CNC), Hugo Maria Fernandes, hateten CNC nu’udar Instituisaun Públiku ida Estadu no Governu nian iha obrigasaun hodi kontinua tulun sobrevivente sira-ne’ebé mak moris mukit iha ámbitu ukun rasik aan ne’e.

Notísia Relevante: CNC-Asosiasaun Vítima apoia “Uma Memória Esperansa” 11 ba sobrevivente sira

Diretór Ezekutivu Centru Nacionál Chega (CNC), Hugo Maria Fernandes. Imajen Tatoli/Francisco Sony.

“Sira mukit tanba violasaun direitu umanus ne’ebé mak akontese iha tempu pasadu iha funu laran. Vitima karik barak loos iha Dare no iha Timor Laran tomak, maibé sira-ne’ebé mak kontinua moris iha kondisaun ida mukit, ida-ne’e mak tenke sai atensaun,” Hugo Maria Fernandes hateten liuhosi nia diskursu iha serimónia lansamentu fatuk dahuluk konstrusaun ‘Uma Ba Memoria Esperansa’ ba sobrevivente iha Nahaek.

Lansamentu fatuk dahuluk ba konstrusaun ne’e, hanesan reparasaun ida ba vítima Duarte Agostu da Silva ho nia espoza ba sira-nia kontribuisaun ba TimorLeste nia ukun rasik aan, tanba sira simu konsekuénsia hosi saida mak sira kontribui ona.

“Ida-ne’e hanesan reparasaun ida. Reparasaun iha forma oioin maibé uma ida-ne’ebé mak ohin ita atu komesa halo, ita bolu uma hosi ‘Memória Ba Esperansa’ ne’e hateten katak, memória sira tempu uluk nian, ita tenke fó esperansa nafatin ba sira,” nia dehan.

Konstrusaun uma ida-ne’e bele hakbiit liután sobrevivente Duarte Agostu da Silva ho nia família, nune’e bele konta ba komunidade iha bairru no suku Nahaek katak saida mak sira halo durante ne’e, Estadu liuhosi Instituisaun sira hanesan CNC tau matan ona ba sira.

“Ami agradese ba Autoridade Lokál ne’ebé mak kontinua apoiu no ami hein katak uma ne’ebé mak halo labele haree ba depois halo transformasaun ba foun bele hamosu fali dezintendimentu. Maibé, ha’u hanoin, sira kontinua presiza itania apoiu hotu. Moris ba sira, karik to’o ohin loron, sira tenke hetan netik buat ruma. Maibé, importante ba sira, hosi ida-ne’e sira bele lori sirania família bele sai di’akliu ba oin,” nia hateten.

Koordenadór Ezekutivu Sekretáriadu Nasionál Asosiasaun Vitima Konflitu Pasadu 1974 no 1999, Domingos Pinto de Araujo, hateten loron ohin sai eventu istóriku ida, maske serimónia simples maibé prosesu ida Duarte ho nia família atu hetan uma ida-ne’e mós liuhosi prosesu ida-ne’ebé naruk.

Koordenadór Ezekutivu Asosiasaun Vitima Konflitu Pasadu 1974-1999. Imajen Tatoli/Francisco Sony.

“Duarte hanesan joven ida-ne’ebé uluk hetan mós agresaun fíziku hosi membru Tentara Nasional Indonesia (TNI) no nia kaben mós ho aleijada. Tanba ne’e mak ita hotu ema baibain, ema susar, maibé ita sente katak ita tenke mai hodi halo netik karidade ruma ba Duarte. Karidade labele ho ibun de’it, maibé tau iha prátika,” nia dehan.

Konstrusaun ida-ne’e halo ba vitima vulneravel, liu-liu vitima levantamentu Marabia barak maibé hanesan selesaun ne’e la’ós desizaun hosi Sekretáriadu Nasionál Asosiasaun Vitima Konflitu Pasadu 1974 no 1999 mesak mak foti, maibé iha ema barak mak foti desizaun katak bele tau matan uluk ba Duarte ho nia família.

“Lansamentu ne’ebé ita halo ohin ne’e, hanesan simbolikamente reprezenta mós hosi uma 10 ne’ebé atu konstrui. Ohin halo lansamentu, nune’e bele aban ba oin, ita hahú ona halo konstusaun uma iha sirania fatin,” nia informa.

Iha biban ne’e, Xefe Aldeia Nahaek, Agusto Soares, hato’o agradese ba Centro Nacional Chega (CNC) tanba liuhosi programa ida-ne’e, bele apoia ona sobrevivente Duarte ho nia família iha suku ne’ebé nia lidera.

“Iha tinan barak ona mak ami hein programa ida-ne’e atu mosu mai, atu tau matan ba aminia komunidade. Tanba, ami laiha kbiit atu tau matan ba aminia komunidade ida ho defisiénsia ida hanesan ne’e. Maibé, hanesan CNC nia forsa ajuda ami, ami fó agradese barak no ami mós kontente simu programa ida-ne’e. Aminia kontente la’ós tanba haree ba osan, maibé haree ba buat ne’ebé ba futuru,” nia dehan.

Nune’e mós sobrevivente Duarte Agostu da Silva nia espoza, Luisa de Fatima Sousa sente kontente no agradese ho programa hosi Governu ne’ebé liuhosi Centro Nacional Chega (CNC) bele apoia hodi konstrui (harii) ‘Uma Ba Memória Espesransa’ ba sira.

Vitima sobrevivente levantamentu Marabia 10 Juiñu 1980, Agostu da Silva, akompaña hosi nia espoza, Luisa de Fatima Sousa, ho matan-been turu bainhira rona diskursu hosi Diretór Ezekutivu Centru Nacionál Chega (CNC), Hugo Maria Fernandes, iha ámbitu lansamentu ‘Uma Ba Memória Esperansa’ iha suku Nahaek, segunda (11/10). Imajen Tatoli/Francisco Sony

“Ha’u husu obrigadu ba kolega sira hotu, hanesan ba suku no ba ha’unia Xefe Aldeia. Obrigadu boot ba sira no mós ba CNC hodi fó oportunidade konstrui ha’unia uma ida-ne’e, tanba tinan barak ona ema nunka tau matan. Ida-ne’e foin primeira vez CNC tau ba matan ha’u ho haunia katuas oan,” nia hateten.

Tuir dadús hosi Centro Nacional Chega (CNC), iha tinan ne’e sei apoia konstrui “Uma Memória Esperansa” ba sobrevivente sira iha territóriu nasionál hamutuk 11, ne’ebé kompostu Munisípiu Dili konstrui uma rua (2), Lautém tolu (3), Viqueque ida (1), Ainaro rua (2), Covalima ida (1) no Liquiça rua (2).

Entretantu, totál orsamentu ba apoia konstrui “Uma Memória Esperansa” ba sobrevivente na’in-11 ne’e hamutuk $160.000.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here