Kayrala Xanana Gusmão hamriik besik estatua Na’i-Feto ne'ebé oferese hosi sarani Fátima, Portugal, hodi lee primeira leitura, iha misa domingu Santa, Igreja Parokia Maliana, domingu (27/02). Imajen TATOLI/Sérgio da Cruz

BOBONARO, 27 fevereiru 2022 (TATOLI)—Líder Istóriku, Kayrala Xanana Gusmão, domingu ne’e, entrega estatua Na’i-Feto, ne’ebé ofere hosi sarani portugés hosi Fátima, Portugal ba Igreja Katólika, Dioseze Maliana, munisípiu Bobonaro.

“Iha seremónia simples ida, sira bolu ha’u dehan, favór lori ba tau iha Timór, ne’e mak ha’u simu knaar ida-ne’e ho ksolok tebes, sira-nia liafuan mak liuhosi estatua ne’e, hakarak hatudu nafatin jestu amizade ne’ebé la kotu entre povu portugués no Timór, iha hahalok, ba kualker atividade no knaar loron-loron iha ukun-an ida-ne’e,” Xanana hateten, hafoin ramata misa, iha Igreja Parokia Maliana.

Seremónia entrega estatua Na’i-Feto ne’e hosi Xanana Gusmão, ne’ebé simu direta hosi Bispu Dioseze Maliana, Don Norberto do Amaral, no akompaña hosi sarani sira hodi halo prosesaun hosi Kámara Dioseze tuan Igreja Parokia Maliana, hafoin Xanana Gusmão ajuda misa domingu Santa hodi lee primeira leitura.

Notísia relevante: Don Norberto deside reativa fali misa iha Dioseze Maliana

Nune’e, Líder Karizmátiku ne’e haktuir, sarani portugués oferere estatua ne’e hanesan jestu solidariedade fraternál fiar relijioza nia, hodi kontribui hametin sarani nia fé, tamba uluk iha tempu okupasaun, povu portugués hamriik metin hodi hakilar maka’as defende direitu povu no sarani timor-oan to’o hetan ukun rasik-an.

Padre Parokia Maliana, Valério Gusmão, tara tais ba Xanana Gusmão. Imagen TATOLI/Sérgio da Cruz

Biban ne’e, Padre Parokia Maliana, Valério Gusmão, reprezenta sarani sira simbolikmente tara tais ba Xanana Gusmão, nu’udar símbolu agradesimentu, tamba nia prezensa iha Portugal, halo povu no sarani iha Fátima oferese estatua ne’e.

Nune’e mós, Bispu Dioseze Maliana, Don Norberto do Amaral, hodi sarani sira nia naran agradese tebes ba laran luak povu no sarani Fátima, tamba bele fó konfiansa ba Xanana Gusmão lori estatua no entrega ba sarani katólika.

“Imajen ida-ne’e Nossa Senhora de Fátima moris iha tinan 1917, mosu iha Fátima Portugal, ema sira iha Fátima ne’ebé laran di’ak, fó domin tomak mai ita liuhosi prezensa Maun Boot Xanana iha Portugal, ne’e duni prezensa illas ida-ne’e bolu atensaun ba ita hotu, nu’udar sarani, hato’o didi’ak autentisidade ba ninia-an, umildade no onestidade iha rai ida-ne’e tamba buat sira-ne’e kontribui ba ita-nia di’ak no salvasaun hodi halo tuir saida mak Maromak haruka,” Bispu tenik.

Bispu Dioseze Maliana, Don Norberto do Amaral. Imajen TATOLI/Sérgio da Cruz

Aleinde ne’e, Don Norberto agradese ba ekipa sira ne’ebé serbisu hamutuk ho Xanana Gusmão, ne’ebé durante ne’e esforsu maka’as, responsabiliza no kuida ona estatua ne’e iha prosesu tomak, desde povu Fátima estraga iha loron 12 fevereiru 2022 to’o ohin loron, sarani Dioseze Maliana simu ho di’ak no domin.

“Estatua ne’e sira hato’o mensajen dehan atu tau iha Katedral Dioseze Maliana, maibé agora ita nia katedral sei iha prosesu konstrusaun nia laran no ita haree katak fatin seidauk favorese, maibé ami sei esforsu nafatin buat ne’ebé ita iha no bele koko rai didi’ak iha Parokia Maliana,” nia akresenta.

Sarani Dioseze Maliana, Maria de Jesus, ksolok tebes ho prezensa estatua Na’in-Feto, tamba bele hametin liután fé nu’udar ema katólika iha kualker aktividade tomak.

“Dahuluk, nu’udar timor-oan, ami agradese tebes ba Avo Nana tamba hosi nia mak estatua ne’e bele mai. Ami agradese mós ba sarani Fátima Portugal, maski ita la koñese malu diretamente, maibé sempre rekoñese nafatin Timór, liu-liu iha vida espirituál no liuhosi illas Na’i-Feto ne’e, ami iha esperansa katak ita-nia amizade no solidariedade sei la kotu,” nia dehan.

Seremónia entrega estatua Na’i-Feto ne’e, partisipa hosi Deputada balun, Padre no Madre, abitante lokál no sarani hosi postu administrativu Maliana, ne’ebé hetan seguransa másimu hosi Polísia Nasionál Timor-Leste, Komandu munisípiu Bobonaro.

Jornalista : Sérgio da Cruz

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here