Vise-Governadór BCTL, Venâncio Maria Alves ho ekipa hasai foto hamutuk ho partisipante sira hafoin ramata formasaun operasaun servisu finanseiru dijitál iha salaun administrasaun Baguia, Munisípiu Baucau, sexta (25/02). Imajén TATOLI/ Antónia Gusmão.

BAUCAU, 25 fevereiru 2022 (TATOLI)— Utilizadór servisu finanseiru dijitál ba tranzasaun liuhosi produtu Telemor MOSAN no Telekomsel TPAY, husu ba operadór telekomunikasaun rua ne’e atu hadi’ak no aumenta kapasidade rede internet iha postu administrativu Baguia, munisípiu Baucau, nune’e sira bele halo tranzasaun ho di’ak.

Kliente Celestino da Conceição konsidera programa kampu dijitál benefisia direta populasaun maibé difikuldade ne’ebé sira sempre hasoru maka liña internet.

“Programa ne’e di’ak tebes tanba tulun ona ami kbiit-laek no povu kiik sira tanba ami bainhira presiza haruka osan ba ami-nia oan iha Dili ka Baucau ami la presiza gasta tan osan $20 no $30 hodi ba to’o iha sira-nia fatin hodi fó osan ba sira. Maibé atu fasilita di’ak liután maka presiza hadi’ak rede intenet no aumenta kapasidade tanba sistema ne’e dijitál entaun presiza rede internet ne’ebé di’ak,” Kliente Celestino hato’o preokupasaun ne’e bainhira partisipa iha formasaun sobre operasaun servisu finanseiru dijitál ne’ebé organiza hosi Banku Sentrál Timor-Leste (BCTL, sigla portugés), iha salaun administrasaun Baguia, sesta ne’e.

Notísia relevante: Administradór Baguia agradese BCTL fó formasaun kona-ba sistema kampu dijitál

Iha biban hanesan, Kliente Mario Xavier da Silva realsa, ko’alia kona-ba servisu dijitál signifika sistema ne’e maioria uza rede internet, maibé haree fali ba liña internet iha postu Baguia rasikk ladun sufisiente ne’ebé difikulta tebes bianhira halo tranzasaun.

“Kuandu rede internet ladi’ak mak bele kria sistema dijitál ida modernu oinsa mós programa ne’e sei labele realiza,” nia preokupa.

Administradór postu Baguia, António dos Ramos, akresenta populasaun maioria iha Baguia uza telemovel liuliu uza kartaun ka Sim-Card Telemor,  Telekomsel no Timor Telekom.

Tanba ne’e, nia husu ba operadór telekomunikasaun tolu ne’e atu harii tan torre iha Baguia hodi nune’e bele fasilita liután populasaun sira.

“Ami maioria uza kartaun Telemor, tanba rede di’ak oitoan. Ida ne’e la’ós ami lagosta Telekomsel no Timor Telekom, ami mós hakarak uza maibé ninia rede mak la asesu duni tanba ne’e mak sé bele karik harii torre iha ami-nia área ne’e, nune’e ami bele uza hotu kartaun hosi Timor Telekom no Telekomsel nian,” Administradór ne’e sujere.

Hatan ba preokupasaun ne’e, Vise-Governadór BCTL, Venâncio Maria Alves haktuir, kona-bá liña internet ne’e kompeténsia operadór telekomunikasaun sira hanesan Timor Telekom, Telemor no Telekomsel.

Tanba ajénsia TPAY ne’e produtu ida hosi Telekomsel duni ho ajénsia ida hosi Telekom ne’ebé bolu naran Financial Tecnology (FILTEC), sira ne’e mak BCTL superviziona no regura, maibé operadór telekomunikasaun ne’e Ministériu Transporte no Komunikasaun liuhosi Autoridade Nasionál Komunikasaun (ANC) mak regula.

“Maibé ami ko’alia ona ho operadór sira balun hanesan Telemor sira kompromete katak sira planea ona atu harii tan torre iha suku Haikoni, postu Baguia. Espera mós Telekomsel bele konsidera hodi aumenta kapasidade liña internet, tanba ida ne’e bele ajuda liután komunidade”, nia hateten.

Notísia relevante : Utilizador apresia implementasaun sistema kampu dijital hosi BCTL

Jornalista : Antónia Gusmão.

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here