Vise-Governadór BCTL, Venâncio Maria Alves hasai foto hamutuk ho komunidade suku Lavateri, postu administrativu Baguia, munisípiu Baucau hafoin formasaun kampu dijitál iha sede suku Lavateri, kinta (24/02). Imajén TATOLI/Antónia Gusmão

BAUCAU, 24 fevereiru 2022 (TATOLI)–Utilizadór sistema kampu dijitál ba tranzasaun liuhosi produtu Telemor MOSAN no Telekomcel TPAY, apresia implementasaun sistema bankáriu hosi Banku Sentrál Timor-Leste (BCTL, sigla portugés).

Utilizadór sistema hosi suku Lavateri, postu administrativu Baguia, munisípiu Baucau, Carlota da Silva Ximenes, haksolok tanba konsidera programa ne’e fó benefísiu tanba hafasil transfere osan ba família, liliu oan sira ne’ebé eskola iha kapitál Dili.

“Ha’u hakarak hato’o esperiénsia katak bainhira sistema dijitál to’o iha suku Lavateri, ami hetan esperiénsia hosi maluk ajénsia balun, tanba sistema dijitál ne’e iha nia vantajen no desvantajen, maibé durante ne’e ami la hetan desvantajen tanba vantajen mak boot liu ba ami. Osan ida hosi karteira ami-nian to’o iha karteira seluk, to’o duni iha fatin ho seguru no buat hotu susesu. Ami agradese tebes sistema ne’e tanba fasilita ona ami,” Carlota da Silva hateten iha ámbitu atividade formasaun, kona-ba operasaun servisu finanseiru dijitál, ne’ebé hala’o iha sede suku Lavateri, kinta ne’e.

Notísia relevante: BCTL inisia formasaun servisu finanseira dijitál ba kliente iha Baucau

Ofisiál Ajénsia MOSAN hosi Telemor rejista hela kliente nia númeru telemóvel hodi asesu ba sistema dijitál, iha suku Lavateri, postu administrativu Baguia, munisípiu Baucau, kinta (24/02). Imajen TATOLI/Antónia Gusmão

Biban ne’e, benefisiáriu sistema dijitál ne’e sujere bele implementa sistema hanesan iha suku seluk iha postu administrativu Baguia, nune’e populasaun sira bele utiliza atu sira labele la’o dook to’o iha Baucau hodi haruka osan ba família no oan ne’ebé hela dook hosi sira.

“Bainhira seidauk iha sistema dijitál, ami hasoru difikuldade, tenki la’o dook to’o iha Banku Baucau no to’o ne’ebá tenki forma dudu malu, gasta osan viajen, difikuldade boot liu maka transporte laiha no udan tan. Tanba ne’e, husu atubele estabelese sistema ne’e iha postu Baguia nune’e ami la’o besik,” nia sujere.

Preokupadu ho liña internet Telemor

Biban hanesan, Abitante suku Lavateri, Celestino Boavida Belo, sujere operadór telekomunikasaun Telemor hadi’a rede internet iha Baucau.

“Tanba sistema dijitál ne’e servisu maioria ho internet, entaun husu atu hadi’a rede internet, nune’e bele fasilita atendimentu ba populasaun. Durante ne’e ami fó atendimentu no difikuldade barak ne’ebé ami hasoru maka rede internet,” nia preokupa.

Nune’e mós, Abitante suku haesan, Francisco de Carvalho, haktuir, nia parte partisipa iha atividade sosializasaun kampu dijitál ne’e dala-rua ona, ne’ebé nia konsidera sistema ne’e kapas tanba bele fasilita sira hodi halo tranzasaun osan hosi karteira eletrónika ida ba seluk.

“Ho sistema ne’e, ita la hasoru ona difikuldade hanesan ba forma kleur iha banku hodi foti osan, ami sente kama’an tebes tanba bele tulun ami no ema seluk ne’ebé presiza halo tuir. Maibé tanba buat hotu via eletrónika, entaun tenki hadi’a liña internet tanba dala ruma ami ba ajénsia MOSAN atu halo transferénsia osan, ajente sira relata liña internet laiha,” nia tenik.

Operadór telekomunikasaun planeia harii torre

Hatán ba preokupasaun ne’e, Xefe Operadór Telekomunikasaun Telemor munisípiu Baucau, Rui Pinto, rekoñese katak durante ne’e rede internet Telemor la maka’as tanba kapasidade internet la to’o.

“Problema ne’e ha’u relata ona superiór, nune’e sei tun direta mai lokál no Telemor planeia ona atu harii torre ida entre suku Defawasi no Afaloikai, ne’ebé lokaliza loos iha área Haikoni nune’e bele normaliza rede internet,” nia adianta.

Nune’e mós, Vise Governadór BCTL, Venâncio Maria Alves, hateten, problema rede internet ema hotu nian inklui Banku, tanba sistema kampu dijitál ne’e presiza rede internet di’ak.

“Ho kompromisu operadór Telemor atu harii tan torre iha Baguia, espera katak bele realiza promesa nune’e fasilita tranzasaun di’ak liután,” Vise Governadór Banku otimista.

Antes ne’e, BCTL ofisialmente lansa programa kampu dijitál iha tinan 2020 iha postu administrativu Maubisse, munisípiu Ainaro, ho objetivu prinsipál atu enkoraja kliente selu ka sosa sasán ruma karik iha loja simples sira, la presiza lori osan cash hodi selu maibé halo tranzasaun hosi karteira dijitál ne’ebé iha no ativu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here