Universidade Nasionál Timor-Lorosa’e (UNTL). Imajen TATOLI/Francisco Sony

DILI, 25 fevereiru 2022 (TATOLI)–Ministériu Ensinu Superiór Siénsia no Kultura (MESSK) liuhosi Komisaun Asesu Engeresu Ensinu Superiór (KAEES), sesta ne’e, anunsia rezultadu kandidatu admitidu ba Universidade Nasionál Timor-Lorosa’e (UNTL) no Institutu Politékniku Betano (IPB).

Prezidente KAEES no atuál Diretora Jerál Ensinu Superiór, Maria Filomena Lay Guterres, relata, númeru kandidatu admitidu hosi UNTL 6.007 no IPB 45, nune’e totál admitidu 6.352.

“Kandidatu admitidu iha UNTL ba tinan akadémiku 2022, kompostu hosi rejime jerál 4.428, rejime espesiál sub rejime oportunidade 527, rejime espesiál sub rejime veteranu, veteranu sira-nia oan no mártir nia oan 637, rejime espesiál sub rejime hakbiit 350 no rejime espesiál sub rejime sira seluk 65,” Prezidente KAEES informa iha salaun Fundasaun Oriente.

Notísia relevante: KAEES halo korresaun pontu ezame hosi aplikante 5.422 asesu UNTL-IPB

Nune’e mós, kandidatu ne’ebé admitidu iha IPB kompostu hosi rejime jerál 242, rejime espesiál sub rejime oportunidade 29, rejime espesiál sub rejime veteranu, veteranu nia oan no mártir nia oan hamutuk 13, rejime espesiál sub rejime hakbiit 40 no rejime espesiál sub rejime sira seluk hamutuk 21.

Rejime jerál kompostu hosi finalista Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV), ho rezultadu mak hanesan estudante finalista hamutuk 26.480, sira ne’ebé konsege prenxe buletín eskola tuir departamentu sira hamutuk 25.324, enkuantu 1.156 seluk la prenxe buletín.

“Hosi totál kandidatu sira ne’e, estudante finalista hosi ESJ no ESTV ne’ebé admitidu ba Ensinu Superiór Públiku hanesan UNTL no IPB hamutuk 4.670, kompostu hosi ESJ na’in-4.135 inklui 127 sira ne’ebé hetan kualifikasaun di’ak hosi munisípiu no kandidatu ESTV iha na’in-535, estudante inklui mós rejime jerál iha kandidatu na’in-44 mak hetan kualifikasaun di’ak hosi nível nasionál,” atuál Diretora Jerál Ensinu Superiór esplika.

Nune’e mós, númeru estudante finalista hosi ESJ no ESTV ne’ebé la admitidu ba Ensinu Superiór liuhosi rejime jerál hamutuk 20.654.

“Ba rejime espesiál ne’e kompostu hosi sub rejime oportunidade, ne’ebé fó oportunidade ba timor-oan sira ne’ebé mak termina ona eskola iha tinan haat ba kotuk hanesan totál kandidatu hamutuk 4.155, kandidatu tuir ezame 3.633, kandidatu ne’ebé la tuir ezame 522, admitidu ba UNTL no IPB 556,” nia akresenta.

Hosi númeru ne’e, na’in-527 ba UNTL no na’in 29 ba IPB, enkuantu kandidatu sira hosi kategoria oportunidade laiha kolokasaun admitidu ba Ensinu Superior Públiku hamutuk na’in-3.077.

Ba kategoria veteranu, veteranu nia oan no martir sira, totál kandidatu 850, kompostu hosi tuir ezame 789, la tuir ezame 61, admitidu ba UNTL no IPB 650, ne’ebé hosi númeru ne’e UNTL 637 no IPB 13.

Kandidatu ne’ebé kategoria veteranu, veteranu nia oan sira no martir nia oan sira ne’ebé laiha kolokasaun (la admitidu) ba Ensinu Superior Públiku hamutuk 139.

Enkuantu, ba kategoria hakbiit fó biban ba ema kbiit laek sira ho rezultadu finál mak hanesan, kandidatu hamutuk 1.031, tuir ezame 979, la tuir ezame 52, no sira ne’ebé admitidu ba UNTL no IPB hamutuk 390, ne’ebé hosi númeru ne’e na’in-350 ba UNTL no na’in-40 ba IPB.

Nune’e mós, ba kandidatu hakbiit ne’ebé la admitidu ba Ensinu Superior hamutuk 589.

Ba kategoria sira seluk hosi rejime espesiál ne’e maka hanesan ema ne’ebé remata ona Ensinu Superiór, tinan boot liu 23, desportista, ema estranjeiru, timor-oan ne’ebé ramata ensinu sekundáriu iha estranjeiru, eskola internasionál, diplomata no diplomata nia oan sira, ema ho defisiénsia no rezidénsia iha Manufahi, ho totál kandidatu 102, admitidu ba UNTL 65 no IPB 21.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here