Vise-Ministru Edukasaun Juventude no Desportu, António Guterres, lansa fatuk dahuluk ba konstrusaun sala iha Eskola ESJ Olocasa, iha suku Ossu de Cima, sesta (11/02). Imajen TATOLI/Vitorino Lopes da Costa

VIQUEQUE, 11 fevereiru 2022 (TATOLI)-Governu liuhosi Ministériu Edukasaun Juventude no Desportu (MEJD), sesta ne’e, lansa projetu komunitáriu iha Eskola Ensinu Sekundáriu Jerál (ESJ) Olocasa, iha suku Ossu de Cima, postu administrativu Ossu, munisípiu Viqueque.

“Ohin ha’u halo lansamentu fatuk dahuluk ba konstrusaun Eskola Olocasa. Komunidade ne’ebé envolve iha konstrusaun ne’e tenki halo ho kualidade hodi uza ba tempu naruk. Nune’e, projetu komunitáriu iha eskola ne’e kompostu hosi sala tolu no toilet ida, nune’e bele fó espasu ba estudante sira,” Vise-Ministru Edukasaun Juventude no Desportu, António Guterres, hateten ba Agência TATOLI, iha resintu eskola.

Notísia relevante: Eskola 17 iha Viqueque tama projetu komunitáriu hadi’a sala aula

Durasaun serbisu projetu ne’e durante fulan-neen, maibé depende ba mudansa klimátika.

“Ha’u husu ba profesór sira tenki kolabora ho komunidade hodi aselera prosesu kontrusaun, tanba komunidade maka kaer obra,” governante ne’e hameno.

Iha fatin hanesan, Diretór Eskola ESJ Olocasa, Ércio Soares Ruas, iha esperansa projetu ne’e bele ramata tuir tempu ne’ebé determina ona.

“Ami fiar katak fulan-neen sei finaliza, projetu ne’e ho ninia kustu hamutuk $120.000, ne’ebé responsável hosi komunidade iha aldeia Bakaisi, suku Osso de Cima,” nia dehan.

Totál estudaunte iha Eskola ESJ Olocasa hamutuk na’in-444 no profesór hamutuk na’in-22.

Eskola iha Viqueque hamutuk 17 sei benefisia programa projetu komunitáriu, kompostu hosi Eskola Ensinu Pre-eskolar 3, ba konstrusaun/reabilitasaun sala neen ho kustu $275.631,25, Eskola Ensinu Báziku Filiál (EBF) hamutuk hitu ba sala 21 ho kustu $708.468,68, Eskola Ensinu Báziku Sentrál (EBC, sigla portugés) 3, ba sala 11 ho kustu $208.043,98.

Eskola ESJ iha eskola tolu, ba sala 10 ho kustu $316.840,24, Eskola Ensinu Sekundáriu Tékniku Vokasionál iha eskola ida ho kustu $159.590,65.

Nune’e, Eskola Edukasaun Pre-eskolár mai to’o EBF no EBC iha Viqueque hamutuk eskola 13 ho sala aula 38 no Eskola Ensinu Sekundáriu Jerál Tékniku Vokasionál hamutuk eskola haat ho sala aula 10.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here