Estrada ligasaun hosi suku Oe-leu ba postu administrativu Lolotoe ameasa atu kotu. Imajen espesiál.

BOBONARO, 25 fevereiru 2022 (TATOLI) – Autoridade Munisípiui Bobonaro halo ona koordenasaun ho Institutu Jestaun Ekipamentu, Institutu Públiku (IGE,I.P, sigla portugés) atu halo normalizasaun ba estrada diresaun hosi suku Oe-leu, postu administrativu Bobonaro ba postu administrativu Lolotoe.

Kondisaun estrada fefere ameasa atu kotu hafoin akontese udan-boot iha loron-kuarta, 23 fulan fevereiru, tuku 08:00 kalan, difikulta movimentasaun komunidade ne’ebé utiliza transporte públiku no privada atu ultrapasa.

“Kona-ba estrada iha Oe-leu ba Lolotoe ne’e la’ós ami foin kordena ho IGE, iha fulan hirak liubá kedas, ami simu pedidu husi autoridade lokál balun, maibé ha’u fiar katak tempu badak sira sei rezolve tanba ami hato’o liuhosi karta verbál, telefoni no SMS mós ita haruka ona ba IGE nasionál,” Sekretáriu Autoridade Munisípiu Bobonaro, João de Fátima do Carmo, informa ba Agência Tatoli, iha kna’ar-fatin, sesta ne’e.

Durante ne’e akontese rai halai, autoridade munisípiu sempre hato’o kedas pedidu ba IGE rejiaun IV Maliana, maibe labele responde ho emerjénsia tanba kestaun limitasaun ekipamentu pezadu.

“Ita-nia pedidu ne’e sira responde tarde uitoan tanba buat ida burokrasia ne’e mak naruk liu, depois IGE n’ebe destaka iha Maliana la’ós tau matan de’it ba ita, nia tenke ba fali Ermera to’o Liquiçá, entaun nia fahe oráriu la to’o, ikus mai estrada sira-ne’e kontinua monu beibeik,” nia fó-sai.

Sekretáriu Administrasaun Munisípiu Bobonaro fó-sai katak, problema hirak-ne’e laiha orsamentu, maibé só bele halao de’it koordenasaun serbisu ho parte IGE.

Xefe Suku Oe-leu, Junuário Bragança, reforsa Ministériu Obra Públika (MOP) atu orienta IJE halo intervasaun lalais, tanba akontese udan rezulta rai sorin monun tán ona.

“Ami (autoridade lokál) mós sai baruk de’it ona, tanba hato’o pedidu beibeik mós nafatin la mosu mai, aat liután mak IGE nia askavatór ida para hela ami-nia suku ne’e mós atu aat de’it ona. Ami husu operadór atu mai, mas dehan mina laiha,” nia akresenta.

Entretantu komunidade postu administrativu Bobonaro ne’ebé utiliza dalan ne’e hamutuk suku tolu, kompostu hosi suku Oe-leu, Tapo-Taz no Leber. Enkuantu postu administrativu Lolotoe nian iha suku hitu, kompostu husi suku Deu-det, Lupas, Lebos, Gildapil, Opa Guda no Lontas. Dalan ne’e mós liga kedas ba munisípiu Covalima.

Notisia relevante: Kondisaun estrada diresaun Oe-leu ba Lolotoe ameasa kotu

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here