Estrada ligasaun hosi suku Oe-leu ba postu administrativu Lolotoe ameasa atu kotu. Imajen espesiál.

BOBONARO, 24 fevereiru 2022 (TATOLI) – Kondisaun estrada diresaun hosi suku Oe-leu, postu administrativu Bobonaro, ba postu admnistrativu Lolotoe ameasa atu kotu.

Kondisaun ne’e ameasa kotu hafoin udan-boot ne’ebé akontese iha loron-kuarta, tuku 08.00 kalan.

“Horikalan akontese udan-boot halo rai halai estraga estrada parte diresaun hosi kruzamentu Oe-leu nia ba iha Lolotoe nia besik atu kotu ona, tanba agora estrada sorin ba atu monu hotu ona, ne’ebé ohin udan mai tán agora parese nia kotu kedas ona,” Xefe suku Oe-leu, Januário ‘Meta-Tae’ Bragança, informa Agensia Tatoli, liuhosi felefónika, kinta ne’e.

Nia fó-sai katak, movimentasaun transporte públiku só motorizada de’it mak bele ultrapasa, maibe ba komunidadae sira-ne’ebé utiliza karreta kamioneta tula sasán ho kuantidade boot difisil atu ultrapasa tanba aliserse rai labele ona atu satan sasán todan.

Líder komunitáriu ne’e haktuir, kuaze fulan-ida resin ona eskavatór ida hosi Institutu Jestaun Ekipamentu, Institutu Públiku (IGE,I.P) Rejiaun IV Maliana para hela iha área Oe-leu nian, maibé nia parte koko kontaktu ba operadór sira atu halo intervensaun lalais, maibé la fó resposta hosi IGE.

“Ekipamentu pezadu ida para iha ne’e atu sai ferujen de’it ona, tanba ne’e ha’u rekomenda ba ministériu tutela atu responde lalais  ba problema ida-ne’e,” nia fó hanoin.

Komunidade Lolotoe, António Freitas, sente triste haree kondisaun estrada refere tanba difikulta tebes sira-nia movimentasaun.

“Ohin ami liu tún mai duni, maibe karreta hela iha-ne’ebá, tanba rai nafera hotu ona entaun karreta susar tebes atu liu ba mai. Sé ida-ne’e mak Governu la rezolve lalais iha tempu badak, sei monu totál kedas, tanba rai ne’e sorin ba ne’e mamar tiha ona,” nia katak.

Nia dehan komunidade Lolotó’e durante atu halo movimentasaun ba kapital Maliana balu utiliza dalan area atus suku Gildapil ninia,maibe iha tempu udan kondisaun estrada refere grave liu halo trasporte didfil movimenta,nune’e husu governu kompetente halo atensaun emerjensia,tanba dalan refere mak bele fasilita sir aba mai iha tempu udan.

Komunidade sira-ne’ebé sempre utiliza dalan ne’e mak postu administrativu Bobonaro nian hamutuk suku tolu, kompostu hosi suku Oe-leu, Tapo-Taz no Leber.

Enkuantu postu administrativu Lolotoe nian mak suku hitu, kompostu hosi suku Deu-det, Lupal, Lontas, Gildapil, Guda, Lebos no Opa, no dalan ne’e mós liga kedas ba munisípiu Covalima.

Jornalista   : Sergio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here