BCTL realiza formasaun iha kona-ba operasaun servisu finaseira dijitál iha suku Lavateri, kinta (24/02). Imajen TATOLI/Antónia Gusmão

BAUCAU, 24 fevereiru 2022 (TATOLI)—Banku Sentrál Timor-Leste (BCTL, sigla portugés), kinta ne’e, inisia formasaun operasaun servisu finanseira dijitál ba kliente iha suku Lavateri, postu administrativu Baguia, munisípiu Baucau.

Vise Governadór BCTL, Venâncio Maria Alves, hateten, inisiativa ne’e nu’udar parte ida hosi programa nasionál kampu dijitál, hodi aumenta koñesimentu komunidade lokál kona-ba servisu sistema P24 no anti brankeamentu kapitál, ho nune’e ajénsia sira bele loke konta karteira eletróniku ba kliente hodi fasilita tranzasaun.

“Banku Sentrál akompaña dezenvolvimentu ekonómiku mundiál inklui Timor-Leste rasik. Tanba ne’e, ita presiza prepara sistema ne’ebé rigorozu atubele ajuda atividade ekonómiku la’o ba oin, ne’ebé bainhira atividade ekonómiku la’o di’ak, servisu finanseira mós tenki la’o di’ak tanba atividade ekonómiku no sosiál hotu envolve tranzasaun finanseiru,” Vise Governadór relata bainhira halo abertura formasaun iha sede suku Lavateri.

Notísia relevante: BCTL ofisializa programa kampu dijitál iha Maubisse

Antes ne’e, BCTL halo ona lansamentu dahuluk iha postu administrativu Maubisse, munisípiu Ainaro iha tinan 2020.

“Objetivu prinsipál kampu dijitál sira maka atu enkoraja ita hotu bainhira sosa no selu sasán ruma iha loja, ita la presiza kaer osan cash hodi selu, maibé transfere de’it osan hosi ita-nia karteira eletróniku ne’ebé iha ona,” nia esplika.

Tuir Vise Governadór, razaun atu implementa sistema ne’e iha postu Baguia tanba konsidera maski fatin ne’e izoladu, maibé kona-ba sistema finanseira tenki funsiona, nune’e bele ajuda benefisiáriu sistema bankária hanesan veteranu, funsionáriu no hirak ne’ebé hetan pagamentu salariál hosi Governu, bele asesu pagamentu simples iha sentru ajénsia MOSAN ka TPAY ne’ebé besik iha hela fatin.

Iha ámbitu ne’e, BCTL husu ba partisipante atu rejistu iha ajénsia MOSAN no TPAY inklui ntegra kartaun débitu ba sistema P24.

Autoridade lokál husu aproveita formasaun

Iha biban hanesan, Xefe suku Lavateri, Geraldo de Viana Soares, konsidera atividade ne’e importante, tanba ne’e nia husu partisipante sira atu aproveita oportunidade ho di’ak.

“Objetivu halibur malu ho veteranu, funsionáriu sira no populasaun balun mak atu partilla informasaun kona-ba lala’ok finanseiru dijitál, tanba haree ba esperiénsia sira liubá, kliente balun sai vítima ba pagamentu, tanba atu halo transferénsia saláriu tenki ba forma naruk iha banku,” Xefe suku dehan.

Nune’e, atividade ne’e bele ajuda partilla informasaun ba malu hodi nune’e bele fasilita funsionáriu sira iha área rurál.

Eventu ne’e partisipa hosi komunidade suku Lavateri rasik, suku Defawasi, Samalari, Uakala no Alawa leten.

Tuir ajénda, BCTL sei realiza mós atividade hanesan iha postu administrativu Baguia villa.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here