Produtu lokál iha bazar tradisionál Dili, sesta (16/10). Imajen TATOLI/António Gonçalves

DILI, 24 fevereiru 2022 (TATOLI)—Ministériu Finansa (MF) liuhosi Diresaun Jerál Estatístika (DGE, sigla portugés) fó sai mudansa persentajen Índise Presu Konsumidór (IPK) hosi grupu hotu iha janeiru 2022, ne’ebé sa’e ba +1,1% kompara ho dezembru 2021 sa’e mós +0,5%.

“Mudansa presu grupu hotu +1,1% tanba hetan kontribuisaun hosi grupu álkool no tabaku +10,6%, hahán no bebida la’ós alkólika +0,4%, edukasaun +3,8%, ekipamentu no manutensaun mobiláriu uma-laran +0,6%,” refere nota hosi MF ne’ebé Agência TATOLI asesu, kinta ne’e.

Nune’e, ba rekreasaun no kultura +0,4%, saúde +0,3%, transporte +0,1%, no hatais no sapatu +0,1%.

Enkuantu, uma -0,8% sai hanesan mudansa kontráriu ba inflasaun grupu hotu, hahán no bebidas la’os alkólika sa’e +0,4% tanba hetan impaktu maioria hosi sub-grupu foos +0,8%, na’an +1,2%, mina no bokur +0,9%, susuben, Keiju no manu-tolun +0,8%, ikan no hahán tasi +0,4% no paun no sereál +0,4%.

Notísia relevante: IPK Dezembru 2019 iha Inflasaun Porsentu 0.1

Modo tahan -0,3% sai hanesan mudansa kontráriu ba inflasaun grupu hahán no bebida la’ós alkólika.

“Mudansa persentajen IPK anuál sa’e +5,4% kompara entre janeiru 2022 ho janeiru 2021, ne’ebé hetan kontribuisaun hosi grupu hahán no bebida la’ós alkólika +6,4%, álkool no tabaku +16,3%,” subliña nota hosi MF.

Ba transporte +5,4%, uma +0,5%, ekipamentu no manutensaun mobiláriu uma-laran +2,5%, rekreasaun no kultura +1,6%, saúde +1%, hatais no sepatu +3,4% no edukasaun (+3,8%) ba anuál janeiru 2022.

Inflasaun negosiável (tradeable) sa’e ba +1,5% no non-negosiável (tradeable) sa’e +0,1% iha mensál kompara entre janeiru 2022 no dezembru 2021.

“Inflasaun tradeable sa’e (+6,5%) no non-tradeable sa’e (+2,6%) iha anuál kompara entre janeiru 2022 ho janeiru 2021,” informa nota komunikadu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here