Governadór BCTL, Abrãao Vasconselhos akompaña hosi partisipante sira tesi fita hodi ofialmente halo lansamentu ba Programa Kampu Dijitál iha Postu Administrativu Maubisse, Munisípiu Ainaro. Domingo (29/11). Imajén Tatoli/Antónia Gusmão.

AINARO, 29 novembru 2020 (TATOLI)–Banku Sentrál Timor-Leste (BCTL, sigla portugés), ohin, ofisialmente halo lansamentu ba programa kampu dijitál iha Postu Administrativu Maubisse, Munisípiu Ainaro.

Governadór BCTL, Abrãao Vasconselhos, hateten programa kampu dijitál ne’e programa ida-ne’ebé Konsellu Administrasaun BCTL deside atu implementa iha tinan 2020.

“Programa ida-ne’e parte ida hosi road map ida ne’ebé mak Konsellu Administrasaun BCTL adota sobre dezenvolvimentu sistema pagamentu nasionál. Ita iha rede nasionál ida ba inter bank banku sira hotu iha Timór laran tomák bainhira sira halo transferénsia, sira uza rede ida bolu rede Timór. Ha’u temi rede P24 ne’e instituisaun finanseira sira uza rede ida-ne’e,” Governadór BCTL, Abrãao Vasconselhos, hato’o kestaun ne’e iha ámbitu lansamentu Programa Kampu Dijitál ne’ebé mak hala’o iha Prasa Maubisse, munisípiu Maubisse, Domingo ne’e.

Governadór ne’e salienta, rede P24 BCTL lansa iha tinan 2018 no daudaun ne’e rede P24 iha ona banku rua mak halo koneksaun direta (BNU no Bank Mandiri), iha koneksaun haat iha koneksaun hotu mak Banku BNU, BNCTL, Banku MANDIRI, no BRI.

“Atualmente ida ne’ebé iha koneksaun agora la’o di’ak hela mak koneksaun entre Banku BNU ho banku Mandiri, saida mak P24 no atu halo saida. BCTL hakarak infraestrutura hotu-hotu ne’ebé mak instituisaun finanseira sira ninian iha ida-ne’e tenke ligasaun ba malu. Kliente ne’ebé ninia konta bankaria iha Banku BNU ninia objetivu hosi programa ida halo interligasaun entre instituisaun finanseira Timor-Leste. Ida-ne’ebé mak konta bankaria BNU lapresiza ba loke tan konta ida iha BNCTL hodi foti osan. Ida-ne’e, ita hakarak ita-nia sistema pogamentu nasionál ne’e sai efisiente liu,” Abrão esklarese.

Dirijente ne’e afirma, sistema pagamentu nia importánsia ne’e boot tebe-tebes tanba ne’e BCTL hakarak sirkulasaun iha atividade ekonómika nian iha parte pagamentu labele iha bareira ne’ebé deznesesáriu.

“Ita iha tinan barak nia laran atividade ekonómiku labele funsiona di’ak, efisiente tanba ita iha sistema finanseira ne’ebé mak la dezenvolve ho di’ak,” Governadór ne’e dehan.

Governadór BCTL, Abrãao Vasconselhos akompaña hosi partisipante sira tesi fita hodi ofialmente halo lansamentu ba Programa Kampu Dijitál iha Postu Administrativu Maubisse, Munisípiu Ainaro. Domingo (29/11). Imajén Tatoli/Antónia Gusmão.

Abrão subliña, BCTL hakarak promove pagamentu dijitál ne’e tanba programa ne’e foun no foin hahú hosi postu Administrativu Maubisse. Tanba ne’e, nia dehan, BCTL ko’alia ona ho autoridade Maubisse katak sei introdus programa monitorizasaun ida iha Maubisse  durante fulan neen to’o tinan ida, hodi haree katak komunidade sira ne’ebé aseita pagamentu eletróniku de’it sei kontinua halo ida-ne’e ka lae iha tempu oin mai no ekipa BCTL kontinua halo akompañamentu.

Programa ne’e, nia hateten, la’ós de’it ba pagamentu maibé programa ida-ne’e nia ámbitu ne’e luan liu ida-ne’ebé mak halo pagamentu dijitál.

Governadór ne’e dehan, iha parte ekonomia nian iha atividade ekonómiku sei funsiona di’ak liu kuandu hetan apoiu ne’ebé mak di’ak hosi parte serbisu pagamentu ninian.

“Tenke halo espansaun másimu bá pontu asesu. Agora dadaun iha postu Maubisse, tuir dadus Telemor ninian pontu asesu hamutuk 20 mak estabelese iha Maubisse durante semana ida-nia laran. Pontu asesu ne’e katak kualker agen ida sai pontu asesu. Ida-ne’e iha territóriu Timór laran foin mak akontese iha Maubisse,” nia dehan. 

Iha fatin hanesan, Xefe Suku Maubisse nu’udar Reprezentante Administradór Postu Administrativu Maubisse, Wilson Nivio Mendonça, hateten hanesan Maubisse-oan sente kontente tebes ho programa nasionál kampu dijitál ida ne’ebé BCTL deside hili Maubisse sai hanesan pilotu hodi estabalese programa ne’e.

“Ida ne’e momentu ida-ne’ebé di’ak tebe-tebes atu fó hanoin mai ita katak ita moris ona iha situasaun ida-ne’ebé modernu, ita tama ona situasaun globál no ita tenke apar ita nia-aan ho situasaun ida-ne’e. Entaun, ho prezensa kampu dijitál nian ne’ebé Maubisse sai hanesan fatin ida-ne’ebé pilotu ba estabelesementu programa ne’e, sente katak ida-ne’e momentu ida-ne’ebé di’ak tebe-tebes. Tanba, ita hahú ona atu bele dezenvolve liuliu iha pagamentu nian. Ida-ne’e, hatudu katak Timor-Leste tama tan iha pasu ida-ne’ebé bele tuir ona nasaun sira seluk ne’ebé moderniza sistema pogamentu kle’ur ona,”  Xefe Suku Maubisse, Wilson Nivio Mendonça hateten. 

Hafoin lansamentu programa Kampu dijitál ne’e kontinua kedas demonstrasaun tranzasaun transferénsia hosi konta MOSAN ba konta BNU, ne’ebé mak hala’o hosi Vise-Governadór Venáncio Maria Alves no Vise-Governadora Nur Ai-Ni Alkatiri ba Maubessi-oan na’in rua (Natalino Mendonça no Dercia Mendonça).

Iha demonstrasaun tranzasaun transferénsia hosi konta MOSAN ba konta BNU ne’ebé hala’o hosi vise-governadór no vise-governadora ne’e, ho osan kada ema $20.

Entretantu atividade lansamentu ne’e partisipa másima hosi komunidade Postu Administrativu Maubisse, autoridade seguransa no autoridade lokál sira, reprezentante hosi Ministériu Koordenadór Asuntu Ekonómiku (MKAE).

Aléinde ne’e, partisipa mós hosi instituisaun finanseira sira hanesan BNCTL, BNU, Bank Mandiri, no empreza Telemor Fintech.

Notísia relevante; http://www.tatoli.tl/2020/11/28/bctl-promove-pagamentu-dijital-dahuluk-iha-maubisse/

Jornalista: Antónia Gusmão

Editór: Cancio Ximenes

HAKEREK NO HATÁN

Please enter your comment!
Please enter your name here