Komunidade ne’ebé hela iha mota-ninin no mota-laran área Comoro kontinua hetan inundasaun hafoin udan-boot iha foho Kasnafar no Aileu, segunda, 21/2/2022.Imajen TATOLI/António

DILI, 24 fevereiru 2022 (TATOLI)— Governu planu atu estabelese estrutura orgánika ba Autoridade Protesaun Sivíl hodi implementa ka ezekuta Lei Protesaun Sivíl númeru 12/2020, 2 dezembru, hodi kriminaliza komunidade ne’ebé harii uma iha fatin risku ba dezastre naturál, hanesan mota ninin, foho lolon, tasi ninin no besik lagoa.

Sekretária Estadu Protesaun Sivíl, Joaquim Gusmão, hateten iha Lei Protesaun Sivíl númeru 12/2020, 2 dezembru, artigu 21 ko’alia kona-bá utilização do solo ka uza rai, fó biban ba protesaun sivíl serbisu hamutuk ho instituisaun-sira hanesan Diresaun Nasionál Terras no Propriedade (DNTP), Ministériu Planu Ordenamentu (MPO), Sekretáriu Estadu Ambiente (SEA), atu bele halo medida prevensaun hanesan tau plaka, hodi bele fó hatene ba komunidade ne’ebé hela iha fatin risku dezastre-nian.

Notísia relevante:  Lei protesaun sivíl foun, kriminaliza harii uma iha fatin risku

Sekertáriadu Estadu Portesaun Sivíl (SEPS), Joaquim José Gusmão dos Reis Martins. Imajen Tatoli/Francisco Sony

“Lei ne’e iha tiha ona, maibé atu hala’o implementasaun  ba lei hodi bandu ka kriminaliza ema labele konstrui uma ka hela iha fatin risku hala’o kuandu harii ona Autoridade Protesaun Sivil tanba sira mak iha kompeténsia atu haree ba kestaun ne’e,” Sekretáriu Estadu ne’e hateten ba Agência TATOLI iha knar fatin Ciacoli, kinta ne’e.

Nune’e, iha loron 15 dezembru 2021, Konsellu Ministru aprova ona lei organika hodi estabelese Autoridade Protesaun Sivíl ho nia estrutura hodi bele ezekuta Lei Protesaun Sivíl.

Governu mós submete ona Lei Organika ba estabelesementu Autoridade Protesaun Sivíl ba Prezidente Repúblika Francisco Guterres Lú-olo, maibé seidauk promulga.

“Kuandu, ita Prezidente Republika promulga ona lei organika ne’e. Ita bele harii Autoridade Protesaun Sivíl ho nia estrutura, hodi bele implementa lei protesaun sivíl ne’ebé mak iha, hanesan fó kontrolu no proibe ema labele hela tan fatin risku sira,” nia akresenta.

Tanba iha lejizlasaun ne’e bandu no bele kriminaliza sidadaun ne’ebé viola hodi konstrui uma iha área risku sira.

“Ha’u hanoin kuandu Autoridade Protesaun Sivíl halo nia kna’ar, mak komunidade sira nafatin halo uma iha fatin risku sei iha sansaun legál hasoru komunidade,” SEPS Joaquim afirma.

Tanba medida prevensaun-sira ne’ebé Autoridade Protesaun Sivíl halo bainhira komunidade la kumpre, bele prosesa ba Ministériu Públiku (MP), kona-bá krime dezobediénsia ne’ebé previstu iha artigu 244 kódigu penál.

Nune’e, SEPS mós sosializa ona lei foun ne’e ba komunidade atu bele hasa’e kuñesimentu no konsiénsia, labele konstrui tan uma iha fatin risku, hodi prevene dezastre iha tempu tuir-mai.

Tuir dadus hosi Ministériu Administrasaun Estatál (MAE), identifika família 2.558 mak hela iha fatin risku dezastre iha munisípiu Dili.

SEPS konsidera lei ne’e sei sai hanesan matadalan atu hala’o dezenvolvimentu iha área protesaun sivíl di’ak liután iha futuru no sei haforsa koordenasaun serbisu entre liña ministeriál no entidade relevante-sira, hodi haree asuntu emerjénsia dezastre naturál, atu bele atua.

Maske nune’e SEPS presiza tan lei ka regulamentu-sira seluk hodi reforsa implementasaun lei foun protesaun sivíl númeru 12/2020, 2 dezembru hanesan prepara lei atu estabelese sistema sukoru, sentru operasaun, lei númeru úniku ho regulamentu ba estatutu protesaun sivíl ho sira-seluk.

Lei foun protesaun sivíl ne’e kompostu hosi kapitulu hitu mak hanesan, Kaptilu I dispozisaun jerál, kapitulu II situasaun alerta, kontinjénsia no kalamidade, kapitulu III diresaun no koordenasaun polítika protesaun sivíl, kapitulu IV estrutura ezekutiva protesaun sivíl, kapitulu V operasaun protesaun sivíl, kapitulu VI forsa defeza no seguransa no kapitulu VII dispozisaun finál, ho nia artigu hamutuk 59.

Notísia relevante:  Governu estabelese estrutura orgánika Autoridade Protesaun Sivíl

Jornalista: Natalino Costa

Editór      :Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here