Vítima inundasaun ne’ebé akontese iha loron 21 fevereiru 2022, daudaun hela iha sentru akollimentu Don Bosco, Comoro, tersa (22/02). Imajen TATOLI/António Dasiparu

DILI, 23 fevereiru 2022 (TATOLI)–Sentru Lojístiku Nasionál (CLN, portugés) apoiu sei apoiu foos saka 200 ba vítima inundasaun uma-kain 57, ne’ebé evakua ba sentru akollimentu Don Bosco, Comoro.

Vítima afetadu inundasaun akontese iha segunda (21/02) maioria hela iha área Comoro, ne’ebé iha tempu ne’ebá kedan evakua ba fatin seguru tanba uma besik mota.

Prezidente CLN, Jervázio Cardoso de Jesus da Silva, hateten, parte armazen nasionál simu ona informasaun hosi Ministériu Administrasaun Estatál (MAE) atu apoiu foos ba vítima inundasaun maibé presiza pedidu mai mak haruka.

“Ami hetan pedidu hosi MAE katak presiza foos saka 200, ne’ebé ami prepara ona no aban sei lori ba fahe ba uma-kain 57 ho membru família 205, ne’ebé daudaun ne’e iha Don Bosco,” Prezidente CLN informa ba Agência TATOLI, iha ninia knaar fatin, Bebora, kuarta ne’e.

Notísia relevante: Foos tonelada 5.000 sei to’o Timor-Leste iha fevereiru 2022

Tuir Responsável armazen nasionál ne’e, stock foos importasaun iha armazenamentu laiha ona maibé sei iha hare kulit ne’ebé antes ne’e sosa iha agrikultór lokál sira, karik akontese situasaun emerjénsia ruma, bele uza hodi atende nesesidade.

“Daudaun ne’e hare kulit iha armazen Maliana no Natarbora sufisiente tanba iha tonelada 535. Tanba ne’e ho hare kulit ne’ebé iha, ami garante katak bainhira akontese situasaun difísil ruma ami bele dulas lalais tanba ita iha mákina, ne’ebé loron ida bele dulas to’o tonelada ualu,” nia akresenta.

Antes ne’e, iha jullu 2020, Governu Timor-Leste halo akizisaun foos tonelada 30.000 ho kustu millaun $15, hosi Vietname, ne’ebé inisiativa ne’e tama iha pakote sosiu-ekonómiku hodi rezerva iha situasaun emerjénsia no garante stock nasionál atubele kompensa bainhira foos menus durante surtu COVID-19.

Aleinde ne’e, iha tempu badak CLN sei importa tan foos tonelada 500 hodi hatan ba situasaun emerjénsia no halo intervensaun merkadu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here