Mota sobu hariis fatin no sala aula turma komérsiu, iha Eskola Ensinu Sekundáriu Tékniku Vokasionál Hera. Imajen TATOLI/Tomé Amado

DILI, 22 fevereiru 2022 (TATOLI)—Udan boot ne’ebé akontese iha segunda (21/02) hamosu inundasaun no mota kuaze sobu sala aula turma komérsiu inklui hariis fatin Eskola Ensinu Sekundáriu Tékniku vokasionál (ESTV) iha Hera.

Tuir Adjuntu Diretór ESTV, Hera Anselmo Freitas, espasu rai metru lima ne’ebé eskola uza hodi instala tanke bee-moos ho kuantidade litru 500 mak mota sobu lakon no mota sobu sala balun.

“Ami presiza ekipamentu hosi obra públika atubele aselera normaliza mota ne’e atu labele fó risku maka’as ba ami-nia eskola, atu ami bele kontinua halo nafatin prosesu ensinu aprendizajen ba estudante,” Adjuntu Diretór informa ba Agência TATOLI, iha resintu eskola Hera, tersa ne’e.

Notísia relevante: SEPS apoia hahán ba vítima inundasaun iha área mota Comoro

Daudaun, kondisaun mota rabat kedan iha eskola ninia hun, ne’ebé kontinua kee aliserse eskola nian.

“Kuandu Governu la halo lalais intervensaun, bainhira udan tun filafali, sala no hariis fatin ne’e mota sobu ona,” nia akresenta.

Ba kestaun ne’e, Ministru Edukasaun Juventude no Desportu (MEJD), Armindo Maia, hateten,  ministériu seidauk bele halo intervensaun buat ida.

“Hafoin Ministériu Obra Publika (MOP) normaliza kondisaun mota ne’e mak ministériu sei haree filafali. Maibé presiza apoiu tékniku sira atu estuda uluk lai, hafoin ministériu bele halo intervensaun liután tanba ministériu lakohi fakar osan, hafoin mota sobu filafali,” Ministru dehan.

Ba kestaun ne’e, Ministru atu haree ho matan kondisaun iha terrenu tanba simu ona informasaun katak eskola ne’e hetan ameasa.

“Loos duni eskola sorin, balun ninia okos hahú mamuk ona inklui hariis fatin,” nia tenik.

Nune’e, governante ne’e sei hato’o kestaun ne’e iha reuniaun Konsellu Ministru, atu nune’e bele hetan desizaun ruma.

Tuir observasaun Jornalista iha terrenu, hatudu katak rai henek hakoi Institutu Jestaun Ekipamentu, Institutu Públiku (IGE, I.P, sigla portugés) nia ekipamentu rua, ne’ebé uza atu normaliza mota inklui uma profesora ida mota sobu.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here