Komunidade ne’ebé hela iha mota-ninin no mota-laran área Comoro kontinua hetan inundasaun hafoin udan-boot iha foho Kasnafar no Aileu, segunda, 21/2/2022.Imajen TATOLI/António Dasiparu

DILI, 22 fevereiru 2022 (TATOLI)— Diretór Jerál, Sekretária Estadu Protesaun Sivil (SEPS), Ismael Babo, informa fó ona apoia emerjénsia ba vítima dezastre naturál ne’ebé akontese iha segunda (21/02) iha área Mota Comoro, ne’ebé daudaun hela iha sentru akollamentu Don Bosco hamutuk 37.

“Horikalan ne’e mota derepente tuun halo ita nian komunidade sira ne’ebé mak hela mota ninin Comoro iha uma-kain pur volta na’in-37 hetan inundasaun liuliu nia-uma mota sobu, nune’e horikalan ne’e, ha’u akompaña Sekretáriu Estadu halo kedan evakuasaun ba iha Dom Bosco, no  ohin ami   apoia kedan ai-han ba sira,” Diretór Jerál SEPS ne’e hateten ba Agência TATOLI via telefónika, tersa ne’e.

Vítima inundasaun, 21 fevereiru 2022 iha salaun Dom Bosco Comoro,tersa 22/2/22. Imajen TATOLI/António Dasiparu

Daudaun ne’e, ekipa SEPS iha hela terenu halo hela identifikasaun ba iha vítimi afetadu ne’ebé maka mota sobu nia uma.

“Ha’u hanoin dadus vítima iha uma-kain 37, maibé seidauk serteza, tanba ita nian tékniku sira sei kontinua halo hela servisu iha tereñu kuanadu hotu ona mak ha’u sei relata ba ita bo’ot sira dadus ne’ebé kompletu,” nia afirma.

Tuir identifikasaun hosi tékniku SEPS iha tereñu nota katak komunidade ne’ebé hetan afetadu inundasaun no mota sobu nia-uma ne’e nafatin abitante sira ne’ebé hetan afetadu iha loron 4 abríl 2021.

“Ita nian komunidade sira ne’ebé afetadu ne’e nafatin sira ne’ebé uluk kona ona dezastre iha 4 abríl liubá, agora sira mak kontinua fila kona-tan dezastre,” nia preokupa.

Nune’e, SEPS husu ba komunidade ne’ebé iha área risku ba dezastre naturál atu muda ho konsénsia atubele prevene aan hosi inundasaun.

“Ha’u hanoin Estadu labele obriga, maibé ita mak tenke iha konsénsia, nune’e ita husu ba maluk sira sente hela iha área riku ba dezastre tenke muda an ona hodi prevene an hosi risku inundasaun,” nia akresenta.

Uma-kain 2.000 seidauk hetan apoia rekuperasaun

Entretantu, Sekretáriu Estadu Protesaun Sivil (SEPS), Joaquim Gusmão, informa vítima ba dezastre natural iha loron 4 abríl ne’ebé mak uma hetan estragu kaman no estragu total, hamutuk uma-kain 2.000 seidauk hetan apoia rekupesaun hosi Governu.

V
Vítima inundasaun, 21 fevereiru 2022 iha salaun Dom Bosco Comoro,tersa 22/2/22. Imajen TATOLI/António Dasiparu

Tuir dadus iha dezastre naturál ne’ebé akontese iha loron 4 abríl 2021, hamutuk uma-kain 5.000 mak nia uma hetan estragu naton no estragu total, hosi númeru ne’e konsege resolve ka rekupera uma-kain 3.000. Nune’e falta uma-kain 2.000 mak seidauk rezolve liuliu halo rekupera ba sira nia uma.

“Ba apoia rekuperasaun uma-kain 3.000 ne’ebé nia uma hetan estragu ne’e ita prevee iha orsamenta iha OJE 2021 no ba uma-kain 2.000 inklui ita nia komunidade sira iha Postu Administrativu Laclo, munisípiu Manatuto, seidauk simu apoia rekuperasaun tanba osan maka la to’o, maibé ita hatama ona ba iha sistema tempu besik ita sei rezolve,” Governante ne’e kompromete.

Daudaun, SEPS planu hela atu halo akizasaun ba material konstrusaun atu distribui ba uma-kain 2.000 ne’ebé seidauk hetan rekuperasaun ne’e.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here