Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 09 fevereiru 2022 (TATOLI)— Komandante Jerál Polisia Nasionál Timor-Leste (PNTL), Komisáriu Faustino da Costa, informa, Komandu PNTL hahú fó kapasitasaun iha área lei ba membru sira atu preparadu hodi asegura atividade kampaña no Eleisaun Prezidensiál ne’ebé sei akontese iha tinan ne’e.

“Ita preparadu asegura atividade kampaña no Eleisaun Prezidesiál, nune’e ita fó hela kapasitasaun ba membru polisia iha área lei ka lejizlasaun oinsá atu ita nia polisia sira atua seguransa karik mosu buat ruma iha kampaña no Eleisaun Prezidensiál,” Komisáriu Faustino da Costa, hateten ba jornalista sira iha City 8, Manleuana-Dili, kuarta ne’e.

Komandu PNTL mós aprezenta ona ba Xefe Governu kona-ba transporte operasionál ne’ebé ajuda fasilita membru PNTL hodi asegura kampaña no Eleisaun Prezidensiál ne’e.

Tanba rezolusaun governu númeru 130/2021 hateten hahú hosi tinan 2022 ba oin laiha alokasaun orsamentu iha kategoria kapitál menór hodi sosa ka kompra viatura.

“Maski nune’e hafoin halo diskusaun ho Primeiru Ministru nuudar Ministru  Interiór no Vise Ministru  Interiór  haree iha duni nesesidade ba instituisaun PNTL atu halo akizasaun ba vitura operasionál atu asegura kampaña no eleisaun. Nune’e ami hein desizaun hosi Governu,” nia akresenta.

Molok ne’e, Vise Ministru Interiór, António Armindo, informa, hahú prevee osan milliaun $4 hodi aluga karreta 45 hodi fasilita Polísia Nasionál Timor-Leste (PNTL) asegura seguransa ba atividade kampaña eleitorál no eleisaun Prezidensiá.

Nia dehan, durante aprezentasaun planu Governu nian liuliu ba antesipasaun kampaña no eleisaun, husu MF atu prevene mós milliaun $1 ba suplementu ba membru PNTL iha ámbitu asegura atividade eventu demokrátiku ne’e.

Nune’e, Ministériu Interiór ho Komandu PNTL koordena malu atu aluga viatura 45 ne’e ho prazu uza ba operasaun durante loron 30 iha períodu kampaña to’o eleisaun Prezidensiál.

Notísia relevante:  MI planu aluga karreta fasilita PNTL asegura kampaña no Eleisaun Prezidensiál

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here