PNTL Unidade Tránzitu halo pasa revista ba karta kondusaun no dokumentu seluk, kuarta, (02/06/21). Imajen TATOLI/António Gonçalves

DILI, 21 fevereiru 2022 (TATOLI)–Diresaun Nasionál Transporte no Terrestre (DNTT) planeia ona atu prodús blanku karta kondusaun ba veíkulu no motorizada hamutuk 82.000 iha tinan ne’e.

“Ami rekoñese preokupasaun públiku liga ho karta kondusaun. Orsamentu ba produsaun blanku haruka hosi Ministériu Transporte no Komunikasaun (MTK) mai diresaun pur pakote, ne’ebé ministériu fahe fali, maibé osan la tuir planu ne’ebé iha, tanba ne’e maka iha problema, maibé ami agora haree hela no tinan ne’e bele rezolve. Sei prodús blanku 82.000,” Diretór Nasionál Transporte Terrestre, António da Costa, relata ba Agência TATOLI, iha ninia knaar fatin, Balide, segunda ne’e.

Notísia relevante: Motorista 1.878 tuir teste prátika atu hetan karta kondusaun

Daudaun ne’e DNTT simu ona orsamentu tinan 2022 no hahú ona prosesu aprovizionamentu ba sasán no servisu sira.

“Kuandu prosesu hotu la’o di’ak, entre fulan-setembru ka outubru, maibé lais liu di’ak liután, nune’e bele rezolve lalais blanku ba karta kondusaun sira,” nia akresenta.

Aleinde ne’e, kona-ba xapa matríkula orijinál ba karreta kiik A23 to’o ona no motorizada P hamutuk 500-resin, tanba prodús iha rai-li’ur, daudaun iha ona dalan mai.

“Orsamentu ba produsaun xapa matríkula ne’e tinan kotuk nian, tanba ne’e mak ha’u la lembra tanba ha’u foin asume kargu janeiru 2022,” nia tenik.

Tuir dadus hosi DNTT, xapa matrikula ne’ebé sei pendente hamutuk 6.818, kompostu hosi karreta kiik 5.819 no kamoneta 999, karta kondusaun hamutuk 23,882 no ba STNK 49.584.

Orsamentu Jerál Estadu (OJE) 2022 ba MTK ho montante $8.976.153, fahe ba kategoria saláriu no vensimentu $2.042.216, bens no servisu $4.272.906, kapitál menór laiha no kapitál dezenvolvimentu $1.398.531, transferénsia públika $1.162.500.

Aleinde ne’e, verba alokadu sei finansia sub-programa 12, atividade 41, no programa lima hanesan telekomunikasaun $1.707.936, transporte $2.543.669, boa governasaun no jestaun instituisionál $4.548.939, portu $55.582 no igualidade jéneru no inkluzasaun sosiál $20.000.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here