Uma Kbiit Laek iha suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

DILI, 17 fevereiru 2022 (TATOLI)—Diretora Programa Nasionál Dezenvolvimentu Suku (PNDS), Claudinha Soares, informa konstrusaun Uma Kbiit Laek (UKL) faze dahuluk iha territóriu nasionál ne’e atinje ona 70%.

“Ita tama ona ba finalidade de obra ida-ne’e, tanba agora ita atinje ona 70%. Antes tama ba faze daruak Uma Kbiit Laek (UKL) nian ita bele konklui ona, tanba ita hein atu entrega de’it ona tanba laiha obra ida mak la konstrui,” Diretora PNDS ne’e hateten ba Agência Tatoli liuhosi telefónika, kinta ne’e.

Tanba, nia informa, konstrusaun Uma Kbiit Laek iha munisípiu Aileu, Ainaro no Manufahi ne’e konklui hotu ona no hein atu entrega ba benefisiáriu sira atu hela bá.

Ba munisípiu sira seluk, tuir nia, konstrusaun Uma Kbiit Laek maiória mak konklui ona tanba nia fizikamente sa’e makaas ona.

Hosi uma kbiit laek 1.254 ne’e uma 22 mak seidauk konstrui tanba iklima hanesan udan mak difikulta iha terrenu hodi labele asesu ba dalan, hodi lori ekipamentu konstrusaun ba suku benefisiáriu sira atu konstrui Uma Kbiit Laek (UKL) ho di’ak.

“Asesu dalan mak ladi’ak hodi konstrui UKL iha suku sira, nune’e to’o agora uma hamutuk 22 kontinua seidauk bele halo tanba kauza hosi iklima hodi difikulta asesu ba dalan,” Diretora PNDS ne’e hateten.

Hosi uma 22 ne’ebé mak seidauk konstrui ne’e iha ninia área jeográfika susar tebes atu atinje, liu-liu asesu dalan mak suku Wairoke, munisípiu Lautém, iha suku tolu iha postu administrativu Laclubar, munisípiu Manatuto nian ne’ebé kauza hosi inundasaun ne’ebé to’o agora dalan kotu.

Iha suku Soba Asanuno nian ne’e mós defísil atu asesu dalan entaun labele konstrui, no dalan iha suku Usicai, postu administrative Zumalai nian mós dalan kotu tiha entaun labele lori materiál konstrusaun ba iha benefisiáriu sira-nia hela fatin.

Ho kestaun hirak ne’e, nia dehan, PNDS nia parte esforsu no tenta halo koordenasaun ho Institutu Jestaun Ekipamentu Institu Públiku (IGE, I.P sigla portugés) atu ajuda no lista suku sira-ne’ebé defísil asesu dalan ne’e, PNDS submete hotu ona ba IGE, I.P.

“Maske nune’e, ami nafatin iha esperansa tanba ami koordena di’ak ho parte IGE, I.P no tempu badak ita sei konklui hotu kostrusaun Uma Kbiit Laek (UKL) ne’e iha tinan ne’e nia-laran,” nia dehan.

Governu prevee osan millaun $25 ba PNDS hodi konstrui Uma Kbiit Laek nian ba tinan 2021 ne’e ho konstrusaun Uma Kbiit Laek hamutuk 1.254.

Notísia Relevante:Tinan 2022: Governu sei konstrui Uma Kbiit Laek 4.000

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here