Uma Kbiit laek (UKL) iha suku Fatulia, postu administrativu Venilale, munisípiu Baucau. Imajen Tatoli/Natalino Belo.

DILI, 09 favereiru 2022 (TATOLI)–Diretór Jerál Dezenvolvimentu Rurál, Rosito Guterres, informa tinan ne’e Governu sei konstrui Uma Kbiit Laek (UKL) ba benefisiáriu iha territóriu nasionál hamutuk 4.000.

Notísia Relevante: PN aprova millaun $63,6 konstrui “Uma Kbiit Laek” 10 kada suku

“Tinan ne’e, ita sei konstrui tán Uma Kbiit Laek ba ita-nia komunidade ne’ebé laiha kbiit ne’e hamutuk 4.000,” Rosito Guterres informa ba Agência TATOLI, iha nia knaar fatin Colmera, Dili, kuarta ne’e.

Tuir polítika Governu nian, konstrusaun Uma Kbiit Laek ne’ebé sei konstrui iha kada suku ne’e ba benefisiáriu ema na’in-10 no daudaun ne’e ekipa PNDS hala’o hela verifikasaun ba benefisiáriu sira.

“Ami PNDS implementa atividade ne’e tuir siklu ne’ebé estabelese ona hamutuk 11. Agora daudaun ne’e tama ona faze verifikasaun ba benefisiáriu sira. Maibé antes ne’e ekipa halo sensibilizasaun, fó formasaun, estabelese ekipa iha suku laran no halo peskiza ba fatin mós ramata ona. Bainhira tama siklu ikus mak tama ona ba faze fíziku katak bele konstrui ona uma,” nia dehan.

Antes ne’e, Ministru Administrasaun Estatál (MAE), Miguel Pereira de Carvalho, hateten iha tinan fiskál 2021 MAE liuhosi PNDS konstrui Uma Kbiit Laek (UKL) hamutuk 1.254, ne’ebé nia progresu iha munisípiu hotu la’o di’ak no hetan apresiasaun boot hosi komunidade ne’ebé hetan benefísiu direta.

Iha tinan 2022, Governu liuhosi Ministériu Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan ida-ne’e.

Tanba ne’e, Parlamentu Nasionál propoin tan osan hamutuk $63,600.000 hodi MAE liuhosi PNDS bele implementa Uma Kbiit La’ek iha 2022, aumenta uma 10 kada suku, nune’e Governu prontu atu implementa programa ida-ne’e.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

1 KOMENTÁRIU

  1. Obrigado ba Nai primeiro Ministro tamba bele eskolha modelu uma ba kbiit laek diak tebes tebes,uma diak sei fo moris hakmatek ba uma nain nomos jerasaun uma laran,sei sai ba fatin dok mos sei fila fali mai uma tamba seguru liu,husu Nai Primeiro Ministro atu bele haluan tan kontekstu direito uma ba kbiit laek nee sebele karik bele klasifika mos ba familia iha uma laran maibe Chefe da Familia servisu laiha ou rendimentu kiik maibe oan barak los dala ruma oan balu la fo ba eskola tamba kbiit moris fahe ba dalan rua hadia uma ou haruka oan ba eskola,nota katak moris ida hanesan nee defisil tebes ,nune husu governu atu hadia mos uma ba sira.

HAKEREK NO HATÁN

Please enter your comment!
Please enter your name here