Timor-Leste 'liki' Brunei 3-1. imajen/ espesial

DILI, 17 fevereiru 2022 (TATOLI)– Ekipa Timor-Leste ho naran istimadu Lafaek U-23 susesu iha nia jornada hodi konkista vitória dahuluk iha jogu AFF  CUP 2022, ne’ebé hala’o iha Kamboja, ohin kalan ne’e, tanba konsege “liki” adversáriu Brunei Darusalam ho eskore 3-1.

Iha jogu primeiru ekipa Lafaek ne’ebé lidera hosi treinadór Brazileiru Fabio Maciel la konsege konkista vitoria, maibé konsege empate 2-2 no hetan de’it pontu ida,  maibé iha jogu segundu kontra Brunei manán 3-1, nuen’e  lori kedan ekipa ne’e tuur iha pozisaun segundu grupu A nian ho pontu haat.

Notísia relevante: Jogu AFF Cup U-23, Ekipa Timor-Leste empate ho Filipina 2-2

Minutu primeiru hahú ekipa rua lansa kedan kontra no atake ba malu tuir tekniku no abilidade ida-idak nian nune’e bele fó Vitoria ba sira nia nasaun.

Timor-Leste domina liu bola kompara ho Brunei Darusalam, maibé iha minutu 17 jogadór Timor-Leste ladun antisipa ho di’ak fó biban kedan ba Brunei marka uluk golu liuhosi jogadór Muhammad Said (10).

Golu ne’e halo Brunei kontente makas, maibé golu ne’e la fó presaun ba ekipa Timor – Leste hodi mellora nia esforsu iha kampo modok ne’e nia leten.

Esforsu hirak ne’e la sai de’it hanesan esforsu tanba hatudu duni prova iha minute 30 jogadór Lafaek Mozinho Barreto de Lima konsege fura rede Brunei muda skore ba 1-1.

Haree ba ritmu jogu la’o ladun di’ak entre lina Timor-Leste nian, Treinadór Fabio foti desizaun iha minutu 42 dada sai avansadu Elias Mesquita (7) hodi dudu tama estrela Paulo Gally (21) jogu komesa moris kedan halo Brunei book an araska iha kampu laran.

Jogu primeira parte besik termina ona, defeza Brunei komete erru iha lina oin sira nian árbitru foti desizaun hodi fó falta ba Timor – Leste atu sutu livre. Iha oportunidade ne’e ezekuta hosi Paulo Gally konsege fó duni valor tanba fura tan rede Brunei muda rezultadu ba 2-1 iha minutu 45+1.

Golu ne’e mak termina jogu primeira parte entre ekipa rua tanba laiha tan golu ruma mak akontese no Vitoria provijoriu hela ba Timor – Leste.

Hakur ba segunda parte ekipa rua nafatin lansa kontra no atake ba malu maibé Brunei laiha forsa atu hasoru Timor – Leste nune’e Timor – Leste halo jogu meiu kampo, sutu barak mak Mozinho de Lima halo maibé sutu hirak ne’e laiha ida mak kona iha alvu.

Iha minutu 69 jogadór Yohanes Gusmão (12) lansa sutu ida ba rede Brunei maibé kona de’it besi bola katik sai fali, sutu ne’e hanesan ameasa ida ba Brunei halo Brunei tauk liu tan.

Nune’e, iha minutu 81 oportunidade monu tan ba Timor – Leste tanba bola barullu makas iha lina Brunei nia oin jogadór Brunei Muhammad la antisipa bola ho di’ak suta  rasik bola tama ba sira nia rede laran muda skore Timor – Leste nian ba 3-1.

Timor-Leste provizóriu okupa klasifikasaun daruak iha grupu A ho pontu haat. Imajen/espesiál.

Hosi golu ne’e mak termina jornada ba ekipa rua ne’e no Timor – Leste mak iha direitu absoluta ba pontu tolu no Brunei tenke hela ho lakon.

Daudaun Timor-Leste ho pontu haat provijoriu tur iha pozisaun primeiru ho pontu haat, enkuantu Kambnoja ho pontu tolu iha pozisaun da-ruak Filipina ho pontu ida iha pozisaun da-tolu no Brunei iha pozisaun ikus ho pontu zero.

Maibé pozisaun Timor-Leste nian ne’e sei provizoriu tanba sei hein jogu entre Filipina no Kamboja bainhira Filipina manán, mak okupa pozisaun primeiru no kamboja manán nia mak okupa pozisaun primeiru,   maibé ekipa rua ne’e empate fó oportunidade ba Timor-Leste nafatin tuur iha pozisaun primeiru grupu A.

Notísia relevante:  Aban, ekipa Timor-Leste kontra Brunei iha jogu AFF Cup U-23

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here