Ekipa Timor-Leste kontra Brunei Darusalam. Imajen/Espesial

DILI, 16 fevereiru 2022 (TATOLI)— Treinadór Prinsipál Ekipa Selesaun Nasionál Timor-Leste U-23, Fabio Joaquim Maciel da Silva, hateten jogu daruak iha AFF CUP, ekipa Timor-Leste kontra Brunei Darusalam, ne’ebé jogu ne’e hanesan jogu determinante ba Timor-Leste hodi utrapasa ba meiu sira tuir mai.

“Jogu ida aban ne’e importante tebes tanba agora ita iha pontu ida, bainhira manán pontu hamutuk haat, tanba jogu primeiru ita empate ho Flipina, sé jogu ho Brunei mak ita manán no tuir mai hasoru Camboja mak empate posibilidade ba ita atu tama ba semi-finál,” Treinadór Fabio hateten ba Agência TATOLI, liuhosi Zoom ne’ebé halo iha Federasaun Futeból Timor – Leste (F-FTL), kuarta ne’e.

Notísia relevante:  Jogu AFF Cup U-23, Ekipa Timor-Leste empate ho Filipina 2-2

Tanba ne’e, Fabio Joaguim dehan hanesan treinadór sei esforsu makas hodi bele manán jogu ne’e atu fó biban ba Timor-Leste hakat ba oin hodi halo istória iha mundu futeból.

Treinadór ne’e afirma kondisaun jogadór maioria di’ak no na’in haat mak pozitivu Covid-19 ne’ebé izola hela iha fatin izolamentu Kamboja nian. Jogadór na’in haat ne’e mak hanesan Paulo Gally (21), Gumario Morreira (13), Nelson Viegas (22) no Novel (3).

“Jogadór haat ne’e mak pozitivu, maibé orsida sira halo teste PCR sé negativu aban sira bele joga, maibé seidauk labele joga. Maske nune’e la fó impaktu ba ekipa tanba jogu hasoru Filipina sira la joga maibé di’ak hela. Ita husu Maromak tulun ba sira negativu di’ak liután ba ita iha jogu aban ne’e,” nia akresenta.

Entretantu iha jogu ne’e nasaun rua mak retira ona tanba maioria jogadór pozitivu Covid-19 hanesan Myanmar no Indonézia. Ho nune’e hela de’it nasaun sia mak sei kompete. Enkuanru Jogu ne’e Timor-Leste tama iha grupu A hamutuk ho Camboja, Brunei, Filipina no Timor – Leste.

Notísia relevante:  Tinan ne’e, Timor-Leste partisipa jogu internasionál neen

Jornalista: Hortencio Sanchez

Editór      : Florencio Miranda  Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here