Vise-Ministru Edukasaun Juventude no Desportu, António Gutteres, halo konferénsia inprensa hodi anunsia rezultadu ezame nasionál, iha salaun enkontru MEJD, Villa verde, kinta (20/01). Imajen TATOLI/Egas Cristóvão

DILI, 20 janeiru 2022 (TATOLI)–Ministériu Edukasaun Juventude no Desportu (MEJD), kinta ne’e, anunsia rezultadu ezame nasionál hosi Eskola Ensinu Báziku no Ensinu Sekundáriu iha territóriu tomak, ne’ebé hatudu katak na’in-18 mak la pasa.

Vise-Ministru Edukasaun Juventude no Desportu, António Guterres, relata, rezultadu ne’e hetan ona aprovasaun hosi MEJD, ne’ebé estudante iha diretu atu tuir ezame nasionál hamutuk 53.366, kompostu hosi estudante Ensinu Báziku 31.143 no Ensinu Sekundáriu 22.223

“Maibé realidade hatudu estudante 1.444 hosi Ensinu Báziku maka auzente no Ensinu Sekundáriu na’in-652, tanba ne’e estudante Ensinu Báziku 29.699 no Ensinu Sekundáriu  21.571 de’it mak partisipa ezame nasionál. Estudante aprovadu hosi Ensinu Báziku 29.185 ekivalente 99,95% no na’in-14 mak la pasa, Enkuantu Ensinu Sekundáriu 21.567 ekivalente ba 99,98% no na’in-haat mak la pasa,” Vise-Ministru informa iha salaun enkontru MEJD, Villa-verde, kinta ne’e.

Notísia relevante: MEJD sei anunsia rezultadu ezame nasionál iha fulan-janeiru nia laran

Tuir governante ne’e, rezultadu publikasaun ezame nasionál ne’ebé MEJD anunsia ona ba públiku, iha mós valór ba eskola ne’ebé mak hetan klasifikasaun di’ak tuir aplikasaun iha ezame nasionál, ba kategoria modelu rua A no B.

“Ba eskola ne’ebé tama iha modelu A maka eskola sira ne’ebé durante períodu Estadu Emerjénsia no Konfinamentu Obrigatóriu, sira kontinua atividade ensinu aprendizajen nafatin, enkuantu ba eskola ne’ebé tama mellor klasifikasaun ho modelu B maka eskola sira ne’ebé durante períodu ne’e la hala’o atividade aula prezensiál.  Tanba ne’e, ministériu ninia elaborasaun matéria pontu ezame nasionál mós diferensa,” Vise-Ministru esplika.

Iha biban hanesan, Koordenadór Gabinete Apoiu Dezenvolvimentu Kurikulár, Mateus dos Reis, hateten, distribuisaun rezultadu ezame nasionál ba diretór no koordenadór eskola sira sei realiza iha sesta aban (21/12).

“Ita-nia diretór edukasaun munisipál sei distribui rezultadu ezame nasionál ba eskola sira aban, atu nune’e sábadu (21/12) parte eskola bele entrega ninia rezultadu ba estudante sira,” nia tenik.

Eskola Ensinu Báziku ne’ebé sai primeiru lugar iha aplikasaun modelu A maka eskola Ensinu Báziku Sentrál (EBC, sigla portugés), Ensinu Báziku Filiál (EBF) Lai-kara, no Ensinu Báziku (EB) Cafe Lautém.

Ba segundu klasifikasaun maka eskola EB São Francisco de Asis, EB Cafe Aileu, EB Santo Inácio de Loiola Liquiçá, EB Dom Bosco FuiLoro, EBC Lospalos, EB Cafe Aileu no EB Aileu.

Enkuantu, ba terseiru lugar maka eskola EBC Lospalos, EB Cafe Aileu, EB Cafe Maliana, EB Santo Inácio de Loiola Liquiçá, EB Cafe Same, EBC Lospalos, EBC Santo Inácio de Loiola, EB Dom Bosco FuiLoro, EB São Francisco de Asis, EB Santa de Maria.

Ba ezame nasionál modelu B nível Ensinu Báziku nian, primeiru klasifikasaun hosi EB Cafe Baucau, EB Maria Auxiliadora, EB São Pedro, no EB São Cristóvão, ba segundu lugar EB Paulo VI, EB Santa Ursula, EB Cafe Ermera, EB São Pedro, EB Cristal, EB Cafe Viqueque, EB Externato São José, EB Cafe Dili, EB Dom Bosco Laga, EBC Salo.

Mellor klasifikasaun ba Ensinu Sekundáriu modelu A, ba primeiru klasifikasaun EB Santo Inácio de Loiola, EB Café Lautém, Ensinu Sekundáriu Jerál (ESJ) Lere Anan Timur, ESJ Koléjiu Maliana, ESJ Café Aileu, no ESJ Café Maliana.

Segundu klasifikasaun EB Santo Inácio de Loiola, ESJ Koléjiu Maliana, ESJ MS Tibar, ESJ São Paulo Aileu, ESJ Santa Maria, ESJ São José Operário, ba terseiru klasifikasaun ESJ Koléjiu Vérvu divinu, ESJ Café Maliana, ESJ Café Lautém, ESJ Nossa Señora Lurdes Hatudu, ESJ Cafe Same, ESJ Santa Maria, ESJ Lautém.

Modelu B ba ESJ, primeiru klasifikasaun ESJ Santo António Baucau, ESJ Ave Maria, ESJ São José Jose Operário, ESJ São Pedro Comoro, ESJ Paulo VI, ESJ Anúr, ESJ Semináriu Menór, ESJ Externato São Jose, ESJ Kálisa. 

Ba segundu klasifikasaun ESJ Sagrado Corração de Jesus, ESJ Santo António Baucau, ESJ Paulo VI, ESJ Sagrado Corração de Jesus, ESJ Santa Madalena de Canossa, terseiru klasifikasaun ba Ensinu Sekundáriu Jerál maka São José Operário, ESJ Externato São Jose, ESJ Sagrado Corração de Jesus, ESJ Cafe Baucau.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here