Reitor DIT, Alvaro Menezes Amaral. Imajen TATOLI/Egas Cristóvão

DILI, 17 fevereiru 2022 (TATOLI)–Instituisaun Ensinu Superiór Privadu, Dili Institute of Technology (DIT) hahú ona prosesu inzensaun propina semester par ba estudante 3.775 ho totál subsídiu hamutuk $552.726.

Tuir Reitór DIT, Alvaro Menezes Amaral, realizaun inzensaun propina ba estudante sira to’o de’it loron-90, hafoin sei aumenta tan loron-15 hodi prepara relatóriu.

“Tanba ne’e, bainhira DIT hetan transferénsia subsídiu orsamentu ne’e, ami halo kedan prosesu pagamentu. Prosesu pagamentu propina ba estudante sira tama ona faze daruak, ne’ebé ninia lala’ok pagamentu hanesan nafatin no laiha mudansa, ne’ebé orsamentu hosi Ministériu Finansa transfere ona ba konta bankária universidade ida-idak nian,” Reitór DIT informa ba Agência TATOLI, via telefónika, kinta ne’e.

Notísia relevante: MF realiza pagamentu inzensaun propina faze daruak ba estudante 66.106

Enkuantu, totál estudante universitáriu hosi Instituisaun Ensinu Superiór 18 ne’ebé rejistu ona atu hetan inzensaun propina hosi Governu hamutuk 66.106, ho totál subsídiu hamutuk $5.428.394, kompara ho tinan kotuk totál estudante 64.589 hetan subsídiu $5.627.537,50.

Iha sorin seluk, parte DIT iha ona plan halo kréditu iha Banku Nasionál Komérsiu Timor-Leste (BNCTL), maibé seidauk aprezenta proposta.

“Ami iha ona planu atu hatama proposta ba banku atu husu kréditu hodi realiza tan konstrusaun edifísiu foun andár tolu,” nia akresenta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here