DILI, 16 fevereiru 2022 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, informa tinan ne’e MAPKOMS loke hikas konkursu ba konstrusaun edifísiu Agência TATOLI Institutu Públiku (TATOLI, I.P) no Rádio e Televisão Timor–Leste, Empreza Públiku (RTTL, E.P) tanba empreza ne’ebé antes ne’e manan konkursu deziste ona.
Notísia Relevante: CAFI Aprova Prosesu Aprovizionamentu Konstrusaun Edifísiu TATOLI,IP-RTTL,EP
“Iha tempu ne’ebá, estudu viabilidade ne’e kompañia ida mak manán maibé la konsege halo estudu, tanba kompañia ne’e rasik nia peritu sira iha tiha rai-li’ur. Entaun, iha fulan liubá ami reuniaun iha CAFI husu atu re-konkursu maibé kansela no agora atu halo konkursu foun hodi hetan kompañia ida atu halo servisu ne’e lalais,” Francisco Martins da Costa Pereira Jerónimo hateten ba Agência Tatoli, iha Palásiu Governu, Dili, kuarta ne’e.
Prosesu loke fali konkursu foun ne’e, daudaun tama ona iha Komisaun Nasionál Aprovizionamentu (CNA, sigla portugués) hodi hetan kompañia foun.
“Tanba, ami hakarak prosesu ne’e lalais iha fulan hirak nia laran. Se dehan iha tinan ikus ne’e seidauk bele implementa, maibé tinan oin mai ita bele halo ona lansamentu ba prosesu primeira pedra. Tanba nia problema agora ne’e mak estudu viabilidade seidauk halo, tanba kompañia ne’e diziste, entaun tenke halo fila–fali ho kompañia foun,” Governante ne’e afirma.
Kona–ba orsamentu estabelesimentu ba edifísiu Agência Tatoli no RTTL, nia akresenta, orsamentu ba estudu viabilidade ho montante $200.000-resin, enkuantu ba konstrusaun edifísiu ba Agência TATOLI, I.P no RTTL, E.P hamutuk millaun $5.
Entretantu, konstrusaun edifísiu ba Agência TATOLI, I.P no RTTL, E.P ne’e, Governu liuhosi Ministériu Asuntu Parlamentár no Komunikasaun Sosiál (MAPKOMS) sei halo iha Ai–Mutin. Enkuantu, kompania ne’ebe antes manán ona iha konkursu ne’e mak Detile hosi Malázia.
Jornalista : Nelia Fernandes
Editór : Cancio Ximenes
