Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 15 novembru 2019 (TATOLI) – Sekretáriu Estadu Komunikasaun Sosiál (SECOMS, sigla portugés), Mericio Juvinal dos Reis “Akara”, hateten Konsellu Administrasaun Fundu Infraestrutura (CAFI, sigla portugés) aprova ona pedidu prosesu aprovizionamentu ba konstrusaun edifísiu Ajénsia Notisioza Tatoli, Institutu Públiku (TATOLI,IP) no Rádiu no Televizaun Timor-Leste (RTTL,EP).

Iha Ministériu Finansa, ohin, Mericio Akara, salienta CAFI aprova ona pedidu, nune’e Komisaun Nasionál Aprovizionamentu (CNA, sigla portugés) bele publika ona konkursu, atu hahú halo estudu viabilidade.

“Ohin hetan ona aprovasaun hosi CAFI, espera iha tempu badak, konkursu públiku ba estudu viabilidade bele lansa ona”, salienta tan.

Maibé, SECOMS politikamente kontente tanba prosesu hahú ona, espera la’o lalais, atu estudu viabilidade bele halo iha fulan haat nia laran, bainhira remata maka tama ba Detailed Engineering Design hafoin ba nia implementasaun.

Tanba ne’e, estudu viabilidade bele hahú iha tinan ne’e, kontinua iha tinan oin, bele remata iha finál 2020, kuandu prosesu la’o di’ak bele lansa ona fatuk dahuluk ba konstrusaun edifísiu.

Entretantu, konkursu públiku loke ba ema hotu, tantu emprezáriu sira iha rai-laran no rai-liur, sé maka manán nia sei halo estudu viabilidade, maibé hakarak ema ne’ebé halo tenke ho kualidade.

Konforme projesaun ne’ebé iha katak totál orsamentu ne’ebé prepara hodi harii edifísiu RTTL,EP inklui torre no edifísiu Ajénsia Tatoli, IP hamutuk millaun $9. Tuir planu fatin ba konstrusaun edifísiu sei halo iha parte Ai-mutin.

Jornalista : Zezito Silva
Editora : Maria Auxiliadora

HAKEREK NO HATÁN

Please enter your comment!
Please enter your name here