Kandidatu Prezidente Repúblika períodu 2022-2027. Imajen/Espesiál.

DILI, 16 fevereiru 2022 (TATOLI)—Vise-Prezidente Komisaun Nasionál Eleisaun (CNE-sigla portugés), Domingos Barreto, hateten Akademista no Sosiedade Sívil mak sei prepara no elabora pergunta ba debate kandidatu Prezidente Repúblika (PR) períodu 2022-2027 ne’ebé sei realiza iha loron 02-06 marsu 2022.

“Pergunta ba debate kandidatu Prezidente Repúblika ne’e ita-nia Akademista no Sosiedade Sívil mak sei prepara no uza lian ofisiál hanesan lian tetún no portugés. Ita husu pergunta ho lian tetún no portugés ba ita-nia kandidatu sira iha relasaun kompeténsia ho Prezidente Repúblika nian,” Domingos Barreto hateten ba Agência TATOLI, iha nia knaar fatin CNE, Colmera, Dili, kuarta ne’e.

Pergunta hotu-hotu sei elabora no uza ho lian ofisiál hanesan Tetún no Portugés, hodi husu ba kandidatu Prezidente repúblika sira ne’ebé konkore iha eleisaun prezidensiál 2022, tanba dalen mós halo parte hanesan kritériu ida ba sira.

Tanba ne’e, CNE iha ona planu atu halo debate polítika ba kandidatu Prezidente Repúblika ne’ebé mak sei fahe sesaun tolu, sesaun ida realiza iha loron 02 fevereiru, daruak iha loron 04 fevereiru no loron 06 fevereiru, tanba CNE hakarak halo dia sim no  dia não katak loron ida halo loron ida la halo tanba ema barak no loron ida lahalo ne’e sira tun ba terrenu hodi halo kampaña eleitorál.

“Ha’u hanoin katak kandidatu sira iha hotu kapasidade no esperiénsia mak kandidata nia-an ne’e. Tanba, ha’u hanoin sira prepara di’ak ona atu bele ezerse sira-nia funsaun nu’udar Prezidente Repúblika,” nia dehan.

Pergunta hirak ne’e, nia dehan, sei elabora fora hosi papél no kompeténsia Prezidente Repúblika nian iha konstituisaun artigu 85 (Kompeténsia rasik) ne’e, Prezidente Repúblika de’it mak sei hala’o knaar hirak ne’e: a) Promulga diploma legislativu no haruka publika rezolusaun husi Parlamentu Nasionál ne’ebé aprova akordu no ratifika tratadu konvensaun internasionál sira; b) Hala’o kompeténsia kona-ba knaar Komandante Supremu Forsas Armadas nian;

Hala’o direitu veto kona-ba diploma lejislativu nian, iha prazu loron 30 nia laran hahú husi loron simu nian; d) Foti no fó pose ba Primeiru Ministru ne’ebé partidu eh aliansa partidu sira ho maioria parlamentár sei foti, wainhira rona partidu polítiku sira-ne’ebé iha Parlamentu Nasionál; e) Husu Tribunál Supremu Justisa nian kona-ba apresiasaun preventiva no ba fiskalizasaun abstratu konstitusionalidade norma sira-nian, no mós haree inkonstitusionalidade tan omisaun; f) Hato’o ba referendu problema boot interese nasionál nian, tuir termu sira iha Artigu 66;

g) Deklara estadu serku nian ka estadu emerjénsia, tuir Parlamentu Nasionál haruka, wainhira rona tiha ona Konsellu-Estadu, Governu no Konsellu Superiór Defeza no Seguransa nian; h) Deklara funu ka halo dame, tuir proposta Governu nian, wainhira rona tiha ona Konsellu-Estadu, Governu no Konsellu Superiór Defeza no Seguransa nian, tuir Parlamentu Nasionál haruka; i) Rona tuir Governu, atu fó perdaun ka hamenus kastigu; j) Konfere, tuir lei, títulu onorífiku, kondekorasaun no mós distinsaun.

Antes ne’e halo debate iha kanál Televizaun Edukasaun (TVE) no fatin seluk kandidatu balun hanesan Prezidente Repúblika Francisco Guterres ‘Lú Olo’ no Vise-Primeira Ministra no Ministra Solidaridade Sosiál no Inkluzaun (MSSI), Armanda Berta dos Santos la ba partisipa, tanba sira sei assume knaar iha Governu maibé iha debate ba kandidatu PR ne’ebé realiza iha loron 02-06 marsu ne’e, kandidatu dira tenke husik knaar no tenke tuir debate refere.

Bainhira debate kandidatu hotu-hotu sei partisipa no laiha kandidatu ida mak atu indika nia reprezentante tanba atu hato’o programa no planu ne’e kandidatu mak bele aprezenta iha públiku ne’e.

Nia informa, moderadór ne’ebé sei modera ba programa debate ba kandidatu Prezidente Repúblika períodu 2022-2027 ne’e, daudaun ne’e sei iha faze identifikasaun nia laran.

Nune’e mós, reprezentante akademista no sosiedade sivíl sira-ne’ebé atu elabora pergunta ba programa debate kandidatu Prezidente Repúblika períodu 2022-2027 ne’e, sei iha faze identifikasaun hodi indika sé mak merese involve iha ekipa elabora pergunta sira-ne’e

Notísia Relevante: O2-06 marsu: kandidatu Prezidente Repúblika sei halo debate

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here