Vise-Prezidente CNE, Domingos Barreto. Imajen Tatoli/Sérgio da Cruz.

DILI, 15 fevereiru 2022 (TATOLI)—Vise-Prezidente Komisaun Nasionál Eleisaun (CNE-sigla portugés), Domingos Barreto, hateten tuir kalendáriu eleisaun prezidensiál 2022 ne’e haktuir kampaña eleitorál ba kandidatu Prezidente Repúblika períodu 2022-2027 ne’e sei hala’o iha loron 02-16 marsu 2022.

Notísia Relevante: STJ hahú verifika dokumentu kandidatu Prezidente Repúblika na’in-17

Domingos Barreto informa, alleinde kandidatu Prezidente Repúblika sira hala’o kampaña iha loron refere, iha loron 02-06 marsu 2022 ne’e, kandidatu Prezidente Repúblika sira sei halo debate públiku no debate ne’e sei halo ba sesaun tolu.

“Maske ita-nia kandidatu Prezidente Repúblika (PR) sei halo kampaña eleitorál hahú iha loron 02 marsu, maibé kandidatu sira la’ós tuun dala ida ba terrenu atu halo kampaña, tanba debate ne’e sei fahe ba sesaun tolu,” Domingos Barreto, hateten ba Agência TATOLi, hafoin partisipa iha semináriu nasionál kona-ba “Papel Partidu Polítiku hodi Prevene no Kombate Korrupasuan iha Timor-Leste” ba kuadru partidu polítiku sira, iha salaun CNE Laline Lariguto, tersa ne’e.

Antes atu halo kampaña no debate, nia informa, kandidatu sira sei asina paktu unidade nasionál ne’ebé sei presiza invove ho lisan-kulturál, nune’e labele kontra regra kampaña eleitorál iha eleiaun prezidensiál 2022.

“Paktu ne’e hala’o, nune’e bainhira halo kampaña ho laran moos no tenke iha regra tanba ne’e involve ho lisan no kultura. Se bainhira nia kontra, nia mak sei hetan sansaun kulturalemente,” nia dehan.

Tuir nia, Paktu Unidade Nasionál sei realiza iha Dili iha loron 23 fevereiru 2022, no iha loron 26-27 fevereiru, lia na’in sira hosi munisípiu 12 mai konsentra iha Dili, nune’e kandidatu Prezidente Repúblika sira sei asina juramentu antes sira ba halo kampaña iha loron 02 to’o 16 marsu 2022.

Kalendáriu eleitorál ba eleisaun Prezidente Repúblika

Dekretu Prezidente Repúblika markasaun loron eleisaun ba Prezidente Repúblika (14 janeiru 2022) no publikasaun dekretu Prezidente Repúblika iha jornál repúblika iha 15 janeiru 2022.

STAE públika kalendáriu operasaun eleitorál, 15-23 janeiru 2022.

Kandidatura no respetivu kontensiozu

Termu prazu ba aprezentasaun kandidatura ba iha Tribunál Rekursu hahú hosi loron 15 fulan-janeiru to’o loron 04 fulan-fevereiru tinan 2022.

Hafoin simu lista kandidadura, Supremu Tribunál Rekursu (STJ) verifika regularidade prosesu, autentikasaun ba dokumentu no elijibilidade kandidatu sira-nian.

Prazu ba iregularidade kazu Prezidente STJ notifika reprezentante kandidatu, no bainhira STJ verifika dokumentu kandidatu sira la kompletu mak sei notifika fila-fali prazu loron rua atu kompleta.

Desizaun Tribunál Rekursu kona-ba kandidatura iha 04-14 fevereiru 2022.

Interpozisaun rekusu ba koletivu Tribunál Rekursu kona-ba admisaun ka rejeisaun kandidatura, 15 janeiru 2022.

Desizaun ba rekursu komunika ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, siglá portugés) relasaun ba kandidatura sira defenitamentu admitida iha 17 fevereiru 2022.

Sekretariadu Tékniku Administrasaun Eleitorál (STAE) divulga ka publika kandidatura definitivamente admitidu iha komunikasaun sosiál iha loron 18 no 20 fevereiru 2022.

Konstituisaun sentru votasaun no estasaun votu

Sekretariadu Tékniku Administrasaun Eleitorál (STAE) divulga númeru no fatin sentru votasaun no estasaun votu iha 17 fevereiru 2022.

Kampaña Eleitorál

Periódu kampaña eleitorál akontese iha loron 02-16 marsu 2022.

Votasaun no apuramentu rezultadu

Loron eleisaun iha 19 marsu 2022 no hafoin prosesu votasaun termina inisíu kontajen votu iha sentru votasaun no envia urna ba apuramentu munisipál.

Apuramentu munisipál ba rezultadu no envi akta eleitorál no elementu (votu nulu, protestadu no reklamasaun ne’ebé existe) ba Komisaun Nasionál Eleisaun (CNE, siglá portugés) iha 19 to’o 21 marsu 2022.

Apuramentu finál rezultadu nasionál Komisaun Nasionál Eleisaun (CNE, siglá portugés) iha 22-24 abríl 2022.

Interpozisaun rekursu ba rezultadu nasionál provizóriu ba Tribunál Rekursu (TR) iha 28 abríl no Tribunál Rekursu (TR) deside rekursu iha 29 abríl 2022. Maibé iha loron 29 abríl CNE remete (haruka) akta rezultadu ba Tribunál Rekursu bainhira laiha rekursu.

Tribunál Rekursu (TR) analiza dokumentasaun envia hosi CNE, valida rezultadu no proklama rezultadu no fó sai númeru eleitór inskritu, votante, votu branku, nulu no votu atribui kada kandidatu iha 30 abríl no 05 maiu 2022.

Ikus liu publikasaun iha jornál repúblika ba akordaun Tribunál Rekursu nian.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here