Sekertariádu Estadu Ambiente, Demétrio do Amaral de Carvalho. Imajen TATOLI/Egas Cristóvão

DILI, 15 fevereiru 2022 (TATOLI)—Sekretária Estadu Ambiente (SEA) no Uniaun Europeia (UE), tersa ne’e, realiza workshop ba validasaun dokumentu hanesan determinasaun kontribuisaun nasionál ka Nationally Determined Contribuition (NDC), atu prepara submete ba United Nations Framework Covention on Climate Change (UNFCCC).

Tuir Sekretáriu Estadu Ambiente, Demétrio do Amaral de Carvalho, inisiativa ne’e deskreve Timor-Leste ninia ambisaun no asaun klimátika ne’ebé halo ona no hakarak halo, hodi mantein kontribuisaun salva guarda planeta hosi dezastre no hasa’e rezilénsia hasoru efeitu alterasaun klimátika.

“Determinasaun kontribuisaun nasionál rasik, kada tinan-lima entrega ba UNFCCC, tanba ne’e atu prepara dokumentu ne’e rasik, Sekretaria Estadu Ambiente kolabora ho Uniaun Europeia, sai parseria ne’ebé fó kontribuisaun liuhosi finansiamentu no asisténsia téknika, ne’ebé serbisu ho konsultór sira hodi finaliza dokumentu ne’e,” Sekretáriu Estadu hateten iha CBD-5, Timor-Plaza.

Notísia relevante: WFP konvida komunidade timor-oan harii reziliénsia ai-han ba mudansa klimátika

Nune’e , iha asisténsia téknika ne’e  ajuda Timor-Leste iha parte jurídiku, nune’e dezenvolve Carbon Farming tanba nesesita lei apropriadu atu dezenvolve oportunidade ho kontekstu programa asisténsia téknika.

Iha fatin hanesan, Embaixadór UE iha Timor-Leste, Andrew Jacobs, hateten, daudaun ne’e prioridade mak kombate mudansa klimátika iha ámbitu halo kooperasaun ho país sira.

Nune’e, UE orgullu ho Timor-Leste ba prosesu NDC, tanba reprezenta kompromisu atu redús emisaun gas karbóniku iha futuru.

“Timor-Leste laiha gás karbóniku barak, maibé importante hatudu ambisaun ba país seluk iha mundu, tanba agora Timor-Leste hetan efeitu ba mudansa klimátika. Ami haree efeitu negativu ne’ebé akontese iha fulan-abríl tinan kotuk, mosu inundasaun no ami hotu sofre hosi inundasaun,” nia dehan.

Inundasaun akontese tanba mudansa klimátika, tanba ne’e presiza kontribuisaun parte hotu no kolaborasaun atu kombate situasaun ne’e.

UE rasik iha projetu ne’ebé foku ba mudansa klimátika hanesan Rai Matak, ne’ebé servisu hamutuk Oxfam ho orsamentu milliaun $2, no Ai ba Futuru, ne’ebe serbisu hamutuk ho GIZ ne’ebé ho fundu milliaun €19,2.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here