Prezidente Komisaun Reguladóra Arte Marsiál (KRAM) Timor-Leste, Octavio da Conçeição, ko’alia ho membru Grpu Arte Marsiál sira. Imajen TATOLI/Abílio Elo Nini.

DILI, 03 fevereiru 2022 (TATOLI)—Hafoin Grupu Arte-Marsiál (GAM) tolu hetan ona lisensa atividade, Komisaun Reguladór Arte Marsiál (KRAM) kontinua komunika ba líder sira atu submete planu atividade ba komisaun no Sekretaria Estadu Juventude no Desportu (SEJD).

“Ami sei kontinua komunika líder arte-marsiál Kmanek Oan Rai Klaran (KORKA), Persaudaraan Setia Hati Terate (PSHT) no Ikatan Kera Sakti (IKS) atu submete planu atividade, nune’e daudaun ita prodús hela lei hodi regula atividade arte-marsiál sira ne’ebé maka sira atu realiza,” Prezidente KRAM, Octávio da Conceição, hateten ba Agência TATOLI, iha ninia knaar fatin, kinta ne’e.

Notísia relevante: KM Aprova Rezolusaun Reativa Arte-Marsiál

Aleinde ne’e, PSHT  rejista  ona  iha Ministériu Justisa (MJ) liuhosi Diresaun Jerál Servisu Rejistu Notariadu no hetan ona lisensa ba tinan-ida.

“PHST rejista iha notariadu iha fulan-novembru no hetan ona lisensa iha dezembru 2021. Maibé, sira sei hein segunda diretiva kona-ba delegasaun kompeténsia ba sub-KRAM hodi halo fiskalizasaun, hafoin sira bele hala’o atividade organizasaun iha ita-nia rain,” nia akresenta.

GAM ne’e sei halo kongresu nasionál iha fulan-marsu ne’e no daudaun iha faze halo baze dadus membru sira.

Organizasaun ne’ebé halibur iha  Federasaun Silat Timor-Leste hamutuk neen hanesan PSHT, IKS,  KORKA, Persai Diri, Sirulin Dewata no Paja-Jaran.

Enkuantu, KRAM sei estuda prosesu rejistrasaun iha Notariadu hosi grupu arte-marsiál Makit Mutin no Elem-Puti.

KRAM kria rekezitu prosesu rejistu GAM iha Notariadu, bazeia ba despaixu SEJD númeru 04/SEJD/IX/2020 kona-ba regra prosesu autorizasaun. 

Antes ne’e, iha loron 19 fevereiru 2020, Governu liuhosi reuniaun Konsellu Ministru aprova Proposta Rezolusaun Governu ne’ebé aprezenta hosi Primeiru-Ministru (PM), Taur Matan Ruak, ba revogasaun Rezolusaun Governu númeru 16/2013 10 jullu, ne’ebé bandu GAM hala’o atividade.

Ho aprovasaun ne’e, GAM bele prátika maibé tenke tuir lei tanba iha rezolusaun antes ne’e bandu labele prátika, maibé hafoin revoga rezolusaun anteriór, agora bele prátika.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here