DILI, 15 fevereiru 2022 (TATOLI)— Prezidente Republika, Francisco Guterres Lú Olo, tersa (15/02) ne’e, fó pose Brigadeiru Jenerál Calisto dos Santos Coli “Coliati” hodi sai hanesan Vise Xefe Estadu Maiór Jenerál Forsa Armada no ba Komodoro Donaciano Costa Gomes Pedro “Klamar Fuik” hodi asume knaar hanesan Xefe Estadu Maiór Forsa Armada.
Iha loron 2 fulan ida-ne’e, Tenente-Jenerál Falur Rate Laek foti knaar aas liu iha ierarkia militár nu’udar Xefe Estadu-Maiór Jenerál Forsa Armada, hodi troka Tenente-Jenerál Lere Anan Timur. Prosesu hirak-ne’e la’o hanesan baibain, ho di’ak no hakmatek, tuir dalan tradisaun militár nian.
“Ohin kompete ba Prezidente Repúblika no Komandante Supremu Forsas Armadas atu lori ba oin prosesu renovasaun ba lideransa militár, hodi evita mosu deskontinuidade ka inserteza hirak ne’ebé ladún fó benefísiu ba ita-nia rain no, ho nune’e, hametin Forsas Armadas nia koezaun no estabilidade,” Xefe Estadu hatete liuhosi diskursu ámbitu pose ba superiór Militar iha Palasiu Prezidensiál, Bairru-Pité.
Nune’e, PR Lú-Olo hato’o felisitasaun no insentivu ba Majór-Jenerál Calisto Santos Coli (Coliati) no Komodoru Donaciano do Rosário da Costa Gomes (Pedro Klamar Fuik), ne’ebé toma pose ba knaar aas nu’udar Vise-Xefe Estadu-Maiór Jenerál Forsas Armada no Xefe Estadu-Maiór Forsa Armada.
Coliati simu pose nu’udar Vise-Xefe Estadu-Maiór Jenerál Forsa Armada hodi foti knaar daruak aas liu iha ierarkia militár. Ho nune’e, sai hanesan kolaboradór diretu mahuluk ba Xefe Estadu-Maiór Jenerál Forsa Armada, hodi fó akonsellamentu militár ba nia.
“Ita hotu hatene ninia kualidade sira ho ninia determinasaun hodi kaer metin misaun sira-ne’ebé mak fó ba nia atu hala’o. Tanba ne’e mak ami fiar katak Jenerál iha kapasidade di’ak tebes atu kaer knaar aas nu’udar Vise-Xefe Forsa Armada no Komodoru Donaciano do Rosário da Costa Gomes (Pedro Klamar Fuik),Ha’u hatene katak ita-boot ofisiál ida ne’ebé naran di’ak, ho kualidade inteletuál no profisionál aas tebetebes hodi kaer knaar iha diresaun Estadu-Maiór Koordenadór Konjuntu no, hamutuk ho Vise-XEMJFA, fó akonsellamentu ba Xefe Estadu-Maiór Jenerál Forsas Armada durante hala’o ninia knaar,” Prezidente Repúblika ne’e fiar.
Ho kontestu mundu ohin loron nian, ne’ebé hasoru mudansa babeibeik, la’ós de’it iha rai-laran maibé mós iha kontestu internasionál, labele prevee ona kona-ba ambiente operasionál no misaun saida loos mak sei iha militár-nia oin iha tempu dame no funu. Tanba ne’e mak, iha ierarkia militár tenke preparadu nafatin hodi hatán no lidera iha sirkunstánsia ne’ebé de’it.
Bazeia ba diploma ne’ebé mak foin lailais aprova, dezafiu boot hirak ne’ebé militár hasoru durante imi-nia mandatu mak oinsá haburas no hametin reforma sira-ne’ebé la’o hela daudaun no modernizasaun ba forsa. Hodi hakat liu dezafiu sira-ne’e, presiza liu prosesu planeamentu ida ne’ebé rigorozu no ezijente kona-ba defeza nasionál.
“Ha’u fiar katak ita-boot sira sei fó apoiu ba Tenente-Jenerál Falur Rate Laek nia asaun komandu, ne’ebé sei presiza ema hotu nia tulun, liuliu hosi sira-ne’ebé serbisu besik liu ho nia no mós hosi komandante Komponente sira Sistema Forsas nian,” nia akresenta.
Timor-Leste iha ona instrumentu sira-ne’ebé presiza hodi harii Estadu Direitu no Demokrátiku, mak hanesan vizaun konseptuál kona-ba komponente militár Seguransa Nasionál ninian, ninia integrasaun iha ordenamentu polítiku no jurídiku, no vontade polítika no institusionál.
“Nu’udar, Xefe Estadu no Komandante Supremu Forsa Armada, ha’u sempre haka’as an atu tane aas Forsa Armada sira-nia naran-kmanek no defende sira-nia dignifikasaun, tanba konsidera nu’udar importante tebes hodi hametin koezaun no unidade Estadu nian no haforsa identidade timoroan,” Aman ba nasaun ne’e hatutan.
Xefe Estadu ne’e mós fiar katak Forsa Armada kaer metin prinsípiu no valore étiku, patriótiku no institusionál ne’ebé mak instituisaun militár nian rasik, atu nune’e bele serbí nafatin ho di’ak ba kauza moris-di’ak no progresu, liberdade no solidariedade Timor-Leste nian.
Nune’e, nian fó konfiansa ba Forsa Armada ho sira-nia ierarkia, konfiansa ba sira-nia patriotizmu no dedikasaun tomak ba rain; konfiansa ba sira-nia knaar nu’udar Instituisaun importante tebes repúblika nian; konfiansa ba kapasidade profisionál ne’ebé sira hatudu beibeik ona, no konfiansa ba sira-nia espíritu reformista no sira-nia konxiénsia kona-ba saida mak modernidade ezije ba sira.
“Dala ida tan, ba Jenerál na’in-rua ne’e ha’u hato’o ha’u-nia votu parabéns no susesu boot ba knaar foun no susar ne’ebé ita-boot sira foin simu. Ha’u hakarak fó-hatene ba ita-boot sira katak bele konta ho ha’u-nia apoiu institusionál no pesoál ba imi-nia knaar ne’ebé de’it,” Prezidente Repúblika afirma.
Notísia relevante: Aban, PR fó pose ba Coliati sai vise Xefe Estadu Maiór Jenerál
Jornalista: Natalino Costa
Editór : Florencio Miranda Ximenes
