DILI, 14 fevreiru 2022 (TATOLI)- Treinadór Boxista hosi Federasaun Boxe Amadór Timor-Leste (FBATL), Gíl dos Santos Isaac, informa hahú fó treinamentu fíziku no tékniku ba atleta na’in-lima hodi reprezenta Timor-Leste ba partisipa Sea Games.
“Ami hahú treina, iha 5 janeiru mai to’o ohin loron ami treina ona agora foin iha fíziku no tékniku, ba oin ita sei aumenta tan tékniku ba atleta sira, ami treinu hahú dader, meiudia to’o lokoraik kada loron,” Treinadór ne’e, hateten ba Agência TATOLI iha fatin treinamentu Benfica Colmera Dili, segunda ne’e.
Notísia relevante: CDTL observa modalidade Taekwondo iha prestasaun di’ak partisipa Sea Games
Nia esplika, treinamentu iha parte tékniku no fíziku nian mak hanesan tuku loos iha tarjetu atu kona ema no oinsá atu defede an bainhira ema tuku. Nune’e atleta hirak ne’e sei ba joga tuir klase.
Nia dehan, atleta timór-oan iha kondisaun fíziku no tékniku di’ak atu reprezenta Timor -Leste iha eventu internasionál ne’e.
“Ita nia atlena na’in lima mak sei partisipa iha eventu internasionál ne’e, maibé daudaun ne’e atleta na’in-neen mak halo hela treinamentu no treinadór sei halo selesaun hodi hili de’it nai’in-lima no ida tenke elimina,” nia esplika.
Atleta hirak ne’e mak, Elidio da Conceição, José Barreto, Elizio Gaio, Jeremias Amaral, Savon Ramos no Delio Mozinho.
Tuir oráriu Sea Games sei hahú iha loron 12 to’o 24 maiu ne’e iha Vietname. Enkuantu Timor -Leste sei reprezenta hosi modalidade ualu mak hanesan, Atletizmu, Natasaun, Taekwondo, Karate-do, Fakutil (hit besi), Voleiból Praia, Futeból no Boxe.
Notísia relevante: Alteta timór-oan hosi modalidade hitu prepara kompete iha Sea Games
Jornalista: Hortecio Sanchez
Editór : Florencio Miranda Ximenes
