Atleta Taekwondo hala’o ezame nasionál. Imajen Tatoli/Hortençio Sanchez.

DILI, 11 fevreiru 2022 (TATOLI)— Prezidente Konfederasaun Desportiva Timor-Leste (CDTL-sigla Portugés), Macario Sanches, informa modalidade Taekwondo hatudu prestasaun di’ak ho ekipamentu ne’ebé modernu atu partisipa Sea Games iha Vietname, iha loron 12 to’o 24 maiu ne’e.

“Ita halo lansamentu ba preparasaun modalidade-ualu ne’ebé atu ba partisipa iha Sea Games iha 05/02 liu-ba, Ita hahú vizita kedan ba Sentru Treinamentu Taekwondo nian, iha ne’ebá ita haree sira nia fasilidade ne’ebé modernu no di’ak liu ho treinadór ne’ebé mai hosi Korea ho nune’e sira nia preparasaun kuaze hatudu sinál pozitivu,” Prezidente CDTL ne’e hateten ba Agência TATOLI iha edifisiu CDTL-Dili, sesta ne’e.

Notísia relevante: FFTL hahú prepara ekipa futeból partisipa SEA Games

Alende ne’e, CDTL mós nota modalidade Boxe ladun di’ak liuliu iha atleta-sira hodi partisipa eventu internasionál ne’e.

Prezidente CDTL, Macario Sanches. Imajen/ Media CDTL

“Ami nota iha modalidade Boxing katak atleta sira ladun preparadu hanesan atleta, tanba iha ne’ebá ita haree sira nunka preparadu, ha’u bolu ona Prezidente Federasaun hodi ko’alia ho sira kona-ba ida ne’e no husu durante iha preparasaun ne’e sira tenke hadi’a no esforsu-an makas tanba ita labele atu ba partisipa de’it maibé tenke ba kompete duni lakon ho dignidade no manán mós ho dignidade,” nia akresenta.

CDTL mós halo ona vizita ba modalidade Karated-do Timor-Leste nota katak preparasaun la’o ho di’ak, maski la di’ak liu hanesan Taekwondo, maibé atleta sira hatudu duni sira nia prestasaun hodi ba partisipa eventu mundiál ne’e.

“Ami haree ona iha modalidade tolu, ne’ebé ita iha konkluzaun ida katak ita iha problema rua hanesan fasilidade seidauk sufisiente atu sira bele presta kualidade no atetude atleta sira nian la’ós modalidade hotu maibé iha ida rua ladun tau-an hanesan atleta hodi reprezenta Timor – Leste,” nia afirma.

Nune’e, CDTL planu atu ko’alia hamutuk ho Sekretáriu Estadu Juventude no Desportu (SEJD) atu haree oinsa ba fasilidade ba atleta sira hodi hala’o treinamentu iha Jináziu-Dili, nune’e bele hasa’e kualidade.

Enkuantu CDTL mós hahú prepara atu halo observasaun ba modalidade lima seluk hanesan atletizmu, natasaun, hiit besi, futeból no voleiból-praia.

Tuir kritéria ne’ebé iha kada modalidade sei reprezenta atleta hamutuk na’in-lima no Futeból mak 22, maibé iha modalidade la hatudu prestasaun númeru ne’e bele mantein ou bele hatun tuir orientasaun SEJD nian ne’ebé hatun ona ba CDTL.

“Atleta sira sei konsentra sira hamutuk atu aranka ba partisipa iha eventu ne’e mak sei deside atleta katak modalidade ne’ebé la hatudu prestasaun di’ak liu labele ba compete, atu nune’e ita bele fó lista fiksu ba Komite Olimpíku Nasionál Timor – Leste (CONTL-sigla Portugés) hodi haruka ba komite organizadora Sea Games nian,” nia akresenta.

Notísia relevante: Alteta timór-oan hosi modalidade hitu prepara kompete iha Sea Games

Jornalista: Hortencio Sanchez

Editór      : Florencio Miranda Ximene

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here