Kondisaun eskola EBF Ualaque, iha suku Uaitame, tersa (19/10). Imajen TATOLI/Vitorino Lopes da Costa

DILI, 29 outubru 2021 (TATOLI)—Diretór Servisu Edukasaun munisípiu Viqueque, Emídio Amaral, hateten, eskola 17 iha Viqueque tama lista projetu komunitáriu atu hadi’a sala aula, ne’ebé sei toma konta hosi grupu komunitáriu sira.

“Eskola Ensinu Báziku Filiál (EBF) Butoo la hetan oportunidade iha projetu komunitáriu tanba Dioseze Baucau hadi’a ona sala tolu ba eskola ne’e. Antes ne’e, Eskola EBF Butoo tama iha lista atu lista atu hadi’a sala aula iha tinan ida ne’e, tanba dadus eskola iha Viqueque atu hadi’a hamutuk 18, maibé hafoin halo verifikasaun, eskola Butoo kansela entaun eskola 17 de’it mak avansa,” Diretór Servisu Edukasaun munisipál informa ba Agência TATOLI, iha salaun Nobre Ian Martin iha Instituto Nacional de Formação de Docentes e Profissionais da Educação de Timor-Leste (INFORDEPE), Balide, sesta ne’e.

Notísia relevante: Grupu komunitáriu preparadu integra iha konstrusaun eskola 18 iha Viqueque

Tuir Diretór, maski EBF Butoo la hetan oportunidade, maibé Servisu Edukasaun prevee konstrusaun ba eskola seluk iha Viqueque hanesan EBF Leoruka, maibé seidauk iha desizaun ida hosi Diresaun Nasionál Dezenvolvimentu Parque Eskolár.

“Bazeia ba rekomendasaun Servisu Edukasaun munisipál, ba eskola Leoruka ne’e halo sala tolu de’it, tanba eskola ne’e halo iha kedan tempu okupasaun Indonézia, ne’e duni kondisaun eskola ne’e mós ladi’ak ona,” nia akresenta.

Eskola iha Viqueque hamutuk 17 ne’ebé sei benefisia projetu komunitáriu kompostu hosi Eskola Edukasaun Pre-eskolar 3, ba konstrusaun/reabilitasaun sala neen ho kustu $275.631,25, Eskola EBF hamutuk hitu ba sala 21 ho kustu $708.468,68, Eskola Ensinu Báziku Sentrál (EBC, sigla portugés) 3, ba sala 11 ho kustu $208.043,98.

Eskola Ensinu Sekundáriu Jerál iha eskola tolu, ba sala 10 ho kustu $316.840,24, Eskola Ensinu Sekundáriu Tékniku Vokasionál iha eskola ida ho kustu $159.590,65.

Nune’e, Eskola Edukasaun Pre-eskolár mai to’o EBF no EBC iha Viqueque hamutuk eskola 13 ho sala aula 38 no Eskola Ensinu Sekundáriu Jerál Tékniku Vokasionál hamutuk eskola haat ho sala aula 10.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here