Ministru Finansa, Rui Augostu Gomes. Imajen TATOLI/Francisco Sony

DILI, 11 fevereiru 2022 (TATOLI)—Prezidente Repúblika (PR), Francisco Guterres ‘Lú Olo’ promulga ona Lei Enkuadramentu Orsamentál no Jestaun Finanseira Públika iha loron 09 fevereiru 2022, ne’ebé nu’udar lei importante no estruturante.

“Aprovasaun ne’e signifika Timor-Leste marka pasu importante ba dahuluk iha ámbitu reforma jestaun finanseira públika no ita konsege estabelese rejime jurídiku ida ne’ebé bele rezolve defisiénsia oioin iha rejime orsamentál atuál. Iha Lei ne’e rasik, ita sei hetan definisaun klaru kona-ba konseitu perimetru orsamentál no sei redus rigidez iha enkuadramentu orsamentál,” Ministru Finansa (MF), Rui Augusto Gomes, hateten, liuhosi nota ne’ebé Agência TATOLI asesu, sesta ne’e.

Notísia relevante: PN aprova proposta-lei enkuadramentu orsamentál iha finál global

Lejizlasaun ne’e sei substitui lei númeru 13/2009, 21 outubru, Orsamentu no Jestaun Finanseira, ne’ebé deskreve prosesu elaborasaun, promulgasaun, ezekusaun no auditoria hosi Orsamentu Jerál Estadu (OJE), ne’ebé iha ona vijénsia liu dékada ida nia laran.

Aleinde ne’e, inisiativa ne’e introdús prinsípiu orsamentál 11 mak hanesan unidade no universalidade, anualidade no plurianualidade, estabilidade no sustentabilidade orsamentál, ekonomia, efisiénsia no efikásia, transparénsia, responsabilidade, ekuidade interjerasionál, orsamentasaun pur programa, espesifikasaun la’ós kompensasaun no la’ós konsignasaun.

“Ho aprovasaun ne’e, ba oin Governu sei prepara diploma neen hodi aprezenta ba Konsellu Ministru atu delibera no aprova hodi apoiu implementasaun Lei Enkuadramentu Orsamentál foun,” nia akresenta.

Tuir Governante ne’e, Lei Enkuadramentu Orsamentál hanesan rezultadu hosi prosesu naruk reforma jestaun finanseira públika ne’ebé mak inisia ona desde tinan 2015 hosi V Governu Konstitusionál no Governu anteriór sira, no halo ona melloramentu lubun ida liuhosi diskusaun iha tinan barak nia laran.

Liuhosi Lei ne’e, Governu propoin atu halo alterasaun substansiál iha aspeitu balun ne’ebé esensiál tebes ba enkuadramentu orsamentál no jestaun finanseira públika, ho objetivu ida mak atu hametin liután relasaun entre planeamentu no orsamentu liuhosi orsamentasaun pur programa ne’ebé foku ba rezultadu.

Desde tinan 2015, V Governu Konstitusionál halo ona servisu advokasia kona-ba reforma fiskál no jestaun finansa públika, liuhosi implementasaun fazeadamente orsamentasaun pur programa, eliminasaun prátika dezorsamentasaun, hasa’e autonomia servisu no melloramentu transparénsia iha ezekusaun orsamentu.

Iha tinan 2019, VIII Governu Konstitusionál hahú elabora Proposta Lei Enkuadramentu Orsamentál no submete ba Parlamentu Nasionál (PN) iha janeiru 2021, ne’ebé durante prosesu preparasaun, elaborasaun no diskusaun inisiativa ne’e, Governu no PN mós halo ona konsultasaun lubun ida ho setór ekonómiku no setór sosiál sira mak hanesan Banku Sentrál Timor-Leste (BCTL, sigla portugés), Rejiaun Administrativa Espesiál Oé-cusse-Ambeno (RAEOA), Institutu Nasionál Seguransa Sosiál (INSS), Kámara Konta, Konsellu Konsultivu Fundu Petrolíferu, FONGTIL, La’o Hamutuk no Fundu Monetáriu Internasionál (FMI).

Enkuantu, proposta Lei Enkuadramentu Orsamentál ne’e rasik inklui ona rekomendasaun balun ne’ebé hato’o ona hosi setór ekonómiku no setór sosiál, inklui kumpre ona prátika di’ak internasionál ne’ebé mak rekomenda hosi Relatóriu Ekipa Misaun Artigu IV, FMI no relatóriu revizaun ba despeza públiku no akuntabilidade finanseira hosi Banku Mundiál.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here