Diretór Eskola EBC Bidau Akadiruhun, Mateus Pinto Tilman. Imajen TATOLI/Tomé Amado

DILI, 11 fevereiru 2022 (TATOLI)—Eskola Ensinu Báziku Central (EBC, sigla portugés) Bidau Akadiruhun, hahú ona prosesu reabilitasaun sala aula, liuhosi projetu komunitáriu hosi Ministériu Edukasaun Juventude no Desportu (MEJD).

Tuir Diretór Eskola EBC Bidau Akadiruhun, Mateus Pinto Tilman, iha sala aula hitu no sintina ida iha eskola ne’e mak tama iha projetu komunitáriu ho kustu projetu $93.300 resin.

“Ohin ita hahú ona reabilita sala aula rua ho fazeadamente to’o fulan-jullu hodi kompleta sala hitu ne’ebé iha,” Diretór eskola informa ba Agência TATOLI, iha ninia knaar fatin, Bidau Akadiruhun, sesta ne’e.

Notísia relevante: Eskola 197 asina ona kontratu projetu komunitáriu hadi’a eskola

Eskola tenke foti desizaun hodi responde planu no programa MEJD liuhosi Diresaun Nasionál Dezenvolvimentu Parque Eskolár (DNDPE) nian hodi halo reabilitasaun infraestrutura.

Enkuantu, projetu komunitáriu ba konstrusaun no reabilitasaun infraestrutura eskola sei hetan fundu pur etapa, ne’ebé fahe ba etapa haat, hahú ho fundu 25%.

“Molok prosesu reabilitasaun atu hahú, halo ona enkontru hodi deside direitu estudante sira-nia atu hetan matéria durante fulan-lima durante prosesu reabilitasaun sala aula,” Diretór akresenta.

Nune’e, desizaun ne’ebé eskola foti mak halo de’it limitasaun oráriu ensinu aprendizajen ba estudante sira hodi husu profesór sira atu tama troka malu durante oras rua nia laran, atu estudante sira labele lakon prosesu ensinu aprendizajen.

“Oráriu ne’e ita kria laiha diferensa ho oráriu ne’ebé ita implementa ona iha situasaun COVID-19,” nia tenik.

Eskola EBC Bidau Akadiruhun iha sala aula 14, ho estudante pur volta, 1.400, ne’ebé kada sala aula bele akumula estudante kuaze 60.

Antes ne’e, MEJD hamutuk ho Diretór eskola hosi 12 munisípiu asina kontratu ba implementasaun konstrusaun no reabilitasaun infraestutura eskola hamutuk 197 iha territóriu nasionál, liuhosi projetu komunitáriu, ne’ebé hosi númeru ne’e, iha Dili iha eskola 16 ho sala 64, ho kustu $1.680.680,12.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here