Kondisaun sala aula Eskola EBF suku Railaco Kraik. Imajen TATOLI/Natalino Costa

DILI, 26 outubru 2021 (TATOLI)–Ministériu Edukasaun Juventude no Desportu (MEJD) hamutuk ho Diretór Eskola iha munisípiu 12 asina kontratu atu aselera prosesu konstrusaun no reabilitasaun eskola 197 inklui sala aula 651 iha territóriu nasionál.

Diretór Nasionál Dezenvolvimentu Parque Eskolár (DNDPE), Hélio Lopes, hateten, tuir planu projetu komunitáriu ne’ebé sei realiza hosi grupu komunitáriu ne’e, sei hahú atividade reabilitasaun iha fulan-novembru tinan ne’e ho totál orsamentu $20.274.586,97.

“Tuir loloos totál eskola hamutuk 204 mak tama ona iha planu atu hadi’a, maibé eskola hitu sei hasoru problema ho rai halai, no mós hadau malu rai entre eskola ho rai-na’in, tanba ne’e ita avansa uluk ho eskola 197 ne’e,” Diretór ne’e informa ba Agência TATOLI, iha ninia knaar fatin, Villa Verde, tersa ne’e.

Notísia relevante: Armindo Maia Planea Reabilita Sala Eskola 1.500

Eskola hitu ne’ebé hasoru hela proble iha munisípiu Ainaro, Covalima, Liquiçá, Manatuto, Baucau no Viqueque, maibé ekipa MEJD tun ona ba terrenu hodi identifika atu buka solusaun no rezolve problema.

Nune’e, Diretór ne’e esplika, eskola 197 no sala 651 ne’ebé tama iha projetu komunitária atu hadi’a, ho ninia durasaun serbisu fulan-neen de’it tenke finaliza ona.

“Agora daudaun kuaze tama ona faze transferénsia ba konta bankária grupu komunitária sira. Ita fiar iha tempu besik Diresaun Finansa hosi Ministériu Edukasaun, Juventude no Deportu bele aselera ona prosesu manda osan ba konta grupu idaidak atubele hala’o ona projetu ne’e,” nia dehan.

Biban ne’e, Diretór husu ba grupu komunitáriu sira ne’ebé hetan ona fiar atu aselera projetu hadi’a eskola no sala aula iha munisípiu 12 ne’e, atu hala’o obra ho responsabilidade.

“Serbisu ida-ne’e pertense mós ba ita hotu nian, nune’e presiza kumpre durasaun tempu no halo obra ho kualidade,” nia hameno.

Eskola 197 no sala aula 651 ne’ebé atu hadi’a hosi munisípiu Aileu hamutuk eskola 13 no sala 40 ho totál orsamentu $1.313.542,97, Ainaro eskola 16 no sala 51 ho totál orsamentu $1.569.735,27, Baucau eskola 29 no sala 92 ho totál orsamentu $2.934.833,51, Bobonaro eskola 21 no sala 76 ho totál orsamentu $2.409.512,03.

Nune’e mós, hosi munisípiu Covalima eskola 15 no sala 49 ho totál orsamentu $1.612.455,32, Dili eskola 16 no sala 64 ho totál orsamentu $1.680.680,12, Ermera eskola 18 no sala 63 ho totál orsamentu $1.808.614,22, Lautém eskola 16 no sala 57 ho totál orsamentu $1.702.312,60, Liquiçá eskola 12 no sala 40 ho totál orsamentu $1.118.377,56.

Iha munisípiu Manatuto eskola sia no sala 29 ho totál orsamentu $770.195,80, Manufahi eskola 15 no sala 46 ho totál orsamentu $1.685.752,39 no Viqueque eskola 17 no sala 48 ho totál orsamentu $1.668.575,18.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here