Delegasaun Timor-Leste ba Expo 2020 Dubai hasorumalu ho grupu emprezáriu Dubai, iha edifísiu Orix World Business Centre, Down Town. Imajen/MTKI

DILI, 11 fevereiru 2022 (TATOLI)–Delegasaun Timor-Leste ba Expo 2020 Dubai, foin lalais ne’e, halo sorumutuk ho grupu emprezáriu Dubai, iha edifísiu Orix World Business Centre, Down Town, hodi ko’alia kona-ba potensialidade Timor-Leste.

Tuir nota ne’ebé Agência TATOLI asesu sesta ne’e, objetivu sorumutu entre parte rua ne’e atu diskute kona-ba selling point haat, ne’ebe sai hanesan prioridade ba Timor-Leste iha ambitu Expo Dubai 2020, hanesan turizmu, agrikultura no peska, transportasaun lojístika, inklui petróleu no minerál.

Notísia relevante: Timor-Leste tama lista fa’an produtu iha Pos-Expo Dubai

Sorumutu ne’e fasilita hosi Enviadu espesiál Timor-Leste ba Expo Dubai 2020, Arif Sagran, no mós Diretór Grupu Oryx World Business, Usman Ahmed, ne’ebé hetan partisipasaun hosi ema-na’in-16, kompostu hosi delegasaun Timor-Leste na’in-sia no na’in-hitu seluk hosi emprezáriu sira iha Dubai.

Durante sorumutu, emprezáriu sira husu kona-ba saida mak sira bele halo iha Timor-Leste, relasiona ho área selling point haat ne’ebe ekipa hato’o, tanba sira mós hakarak hatene karik iha planu mestre relasiona ho área hirak ne’ebé mensiona, bele fahe mós ho sira, atu nune’e sai hanesan baze legál no mata-dalan ba sira.

Hatan ba preokupasaun hirak ne’e, Enviadu espesiál Timor-Leste ba Expo 2020, Arif Sagran, hateten, Timor-Leste presiza halo konesaun ho nasaun seluk, liuhosi ligasaun aéreu ho aviaun Emirates Air, ne’ebé Governu prontu fasilita investidór sira.

Daudaun iha ona aviaun hosi nasaun balun ne’ebé halo ligasaun entre Timor-Leste ho nasaun seluk hanesan Citilink, Qantas, Euro Atlantis, no Malindo, maibé tanba COVID-19 agora daudaun voo la normál.

Nune’e mós, Diretór Jerál Turizmu, Jelino Soares, dehan, Timor-Leste iha potensilidade boot iha área turizmu, ne’ebé bele atrai investidór sira.

“Ezemplu turizmu kultura, turizmu relijiozu, eko turizmu, paizajen  ne’ebé furak, no seluk tan ne’ebé mak presiza halo dezenvolve,” nia dehan.

Aleinde ne’e, delegasaun Timor-Leste aprezenta mós kona-ba setór agrikultura no peska, tanba Timor-Leste iha tasi ho rikusoin tasi nian, ne’ebé to’o agora seidauk iha empreza ida mak halo esplorasaun másimu, no setór agrikultura iha kafé, ai-kameli, nuu no kamii sai nu’udar setór ne’ebé presiza mós halo investimentu.

Ekipa mós refere ba setór petróleu no minerál, ne’ebé Timor-Leste iha mina, gás no seluk tan ne’ebé oras ne’e daudaun espalla iha fatin balun iha Timór laran.

Sorumutu ne’e rasik hetan apresiasaun hosi emprezáriu sira no sei iha kontinuasaun iha Paviliaun Hungaria nian hodi ko’alia kle’an kona-ba teknolojia dezenvolvimentu iha área agrikultura hosi nasaun ne’e, ne’ebé sei implementa iha Timor-Leste.

Antes ne’e, Autoridade Expo Dubai hili Timor-Leste hanesan país iha pozisaun 50 hosi país 192, hodi fa’an produtu iha pavilaun Expo ne’ebé maka Pos-Expo sira atu halo.

Expo Dubai 2020 realiza iha Dubai, Emiradus Árabe Unidu, hosi loron 01 outubru 2021 to’o 31 marsu 2022, ne’ebé hanesan espozisaun mundiál dahuluk iha Médiu Oriente no partisipa hosi nasaun 190-resin.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here