Koordenadór Jerál Autoridade Nasionál Expo Dubai Timor-Leste, (ANE-TL). Manuel Vong. Imajen TATOLI/Francisco Sony

DILI, 09 dezembru 2021 (TATOLI)—Ekipa Autoridade Expo Dubai halo avaliasaun ba produtu ne’ebé país 192 fa’an iha paviliaun espozisaun mundiál, nune’e Timor-Leste hetan fatin fa’an produtu bainhira eventu mundiál ne’e ramata ona tanba konsidera produtu ne’ebé aprezenta orgániku no di’ak.

“Autoridade Expo Dubai hili Timor-Leste hanesan país iha pozisaun 50 hosi país 192, hodi fa’an produtu iha pavilaun Expo ne’ebé maka Pos-Expo sira atu halo. Pos-Expo hili Timor-Leste hanesan nasaun iha pozisaun 50 hodi fa’an produtu iha Dubai,” Koordenadór Jerál Autoridade Nasionál Expo Dubai, Manuel Vong, relata ba Agência TATOLI, iha ninia knaar fatin, iha Kampu Alor, kinta ne’e.

Tanba ne’e, parte autoridade halo ona koordenasaun ho Ministériu Agrikultura no Peska (MAP) atu prepara-an ba Pos-Expo.

“Ita-nia produtu labele para, tanba ne’e buka haruka nafatin produtu ba, la presiza ho kuantidade boot, karik iha pelu menus fulan-ida manda kontentór ida mós di’ak ona, ne’e bele dehan produtu sira iha ona merkadu,” nia akresenta.

Tuir Koordenadór Jerál Expo Dubai, lista ne’ebé simu hosi ekipa iha Dubai katak produtu ne’ebé vizitante sira sosa, barak liu mak kafé no tuir mai mak Baunilla.

Maski nune’e, produtu hanesan kafé no baunilla rasik komesa menus ona, nune’e daudaun ne’e ekipa Expo Dubai prepara ona atu exporta.

“Kafé iha pavilaun menus ona, nune’e Autoridade Expo Dubai Timor-Leste deside sei haruka tan kafé hamutuk kontentór ida tanba haree ba kbiit orsamentu, entaun kuantidade kafé ne’ebé haruka la to’o tonelada ida. Kafe ne’e foti hosi Timór Globál, maibé sei hein autorizasaun hosi Autoridade Expo Dubai tanba produtu sira ne’e tenke hetan sertifikasaun,” nia esplika.

Notísia relevante: MAP sei haruka tan kafé kontetór ida ba Dubai

Aleinde ne’e, vizitante no investidór sira iha interese atu investe iha setór petróleu no turizmu.

Kada loron, vizitante iha pavilaun Timor-Leste la menus hosi 300 no iha fim-de-semana bele atinje 1.000 to’o 2.000.

“Hosi loron 01 outubru  to’o oras ne’e, vizintante ne’ebé vizita pavilaun kuaze 40.000. Hosi totál ne’e, 65% la hatene Timór, ho nune’e buat ida interesante ba ita maka promosaun Timor-Leste iha Expo Dubai, ho duni intensaun vizibiliza Timor-Leste iha fórum internasionál ne’e hetan duni atensaun hosi públiku,” Manuel Vong  tenik.

Produtu ne’ebé lori ba Expo Dubai iha rua, ida hanesan produtu display no seluk hanesan produtu komersiál, ne’ebé mai hosi setór privadu sira.

Kona-ba produtu hira mak ema sosa ona no akumula ona osan hira, Koordenarór Jerál seidauk bele relata serteza tanba seidauk simu relatóriu finál hosi ekipa iha paviliaun.

Autoridade Expo Dubai avalia Timor-Leste tama iha kategoria A

Iha sorin seluk, Autoridade Expo Dubai halo avaliasaun ba Timor-Leste durante partisipasaun iha eventu mundiál ne’e, ne’ebé hetan rezultadu di’ak.

“Sira hili Timor-Leste hanesan nasaun ne’ebé tama iha kategoria A, ne’e susesu ne’ebé ita iha, ne’e sira halo avaliasaun ba ita hanesan ospitalidade, katak Timor-Leste nia maneira simu ema di’ak tebes no fatin moos, seguransa di’ak ba sasán, no ikus liu maka ita-nia produtu ne’e úniku,” nia dehan.

Tanba ne’e, Koordenadór jerál husu ba ekipa paviliaun iha Dubai no seluk ne’ebé sei arranka iha inísiu tinan oin atu mantein servisu di’ak, hodi nune’e nafatin manán konfiansa.

“Dadaun ne’e, ekipa Timor-Leste iha Expo Dubai hamutuk na’in-14, ne’ebé iha loron 06 janeiru tinan oin sei troka ho ekipa seluk,” Manuel Vong informa.

Expo Dubai 2020 realiza iha Dubai, Emiradus Árabe Unidu, entre loron 01 outubru 2021 no loron 31 marsu 2022, ne’ebé hanesan espozisaun mundiál dahuluk iha Médiu Oriente no partisipa hosi nasaun 190-resin.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here