PNTL hahú reativa hikas “check point” iha tempu kalan
DILI, 10 fevereiru 2022 (TATOLI)— Polísia Nasional Timor-Leste (PNTL), liuhosi Komandu Munisípiu Dili reativa hikas pasa revista ka check point iha tempu kalan, nune’e bele garante seguransa ba públiku.
“Horikalan ita halo pasa revista iha fatin tolu iha área Cristu-Rei, Nain-Feto no Dom Aleixo, ita nian tarjetu ba iha pasa revista ne’e maka dokumentu motór no karreta, sasan kroát no droga, maibé horikalan ita nian pasa revista ne’e la hetan evidénsia sira hanesan droga ka sasán kro’at,” Komandante PNTL Munisípiu Dili, Superintendente Xefe, Hendrique da Costa, hateten ba jornalista-sira iha Komandu PNTL-Caicoli, kinta ohin.
Pasa rejista ne’e, Komandu Dili hetan apoia hosi Unidade Espesiál Polisia (UEP), Unidade Patrollamentu Fronteira (UPF) ne’ebé koloka iha Aeroportu no Unidade Polísia Maritima (UPF).
“Tanba ita hatene atu tama ona ba iha kampaña iha movimentasaun barak, nune’e ita nian atividade pasa revista ida ne’e fó alvu liubá ida ne’e atu sidadaun bele sente seguru bainhira halo movimentu kalan,” Superintendente Xefe ne’e akresenta.
Nune’e, rezultadu hosi operasaun, kuarta kalan, konsege halo apreensaun ba motór hamutuk 45 no daudaun objetu hirak ne’e para iha komandu Dili atu parte tránzitu aplika multa.
Komandante PNTL Dili husu ba motorista atu lori karreta no motór tenke kumpre regra tránzitu.
“Ita husu ba iha sidadaun sira, bainhira halo movimentu labele haluhan lori dokumentu no mós haree asesores karreta ka motór ninian, atu bainhira hasoru malu parte seguransa ne’ebé maka halo pasa revista bele aprezenta,” nia rekomenda.
Notísia relevante: Operasaun “HABERAN” konsege detein membru PNTL-F-FDTL na’in-rua
Jornalista: Natalino Costa
Editór : Florencio Miranda Ximenes
