Ekipa konjunta PNTL no F-FDTL ensera ona operasaun disiplina konjunta ho kodigu “HABERAN”. imajen/ média PNTL.

DILI,04 janeiru 2022 (TATOLI)— Komandu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) deside hamosu operasaun konjunta ho kodigu “HABERAN” hodi garante seguransa iha tempu Natál 2021 no Tinan foun 2022.

Operasaaun HABERAN lansa iha loron 13 dezembru 2021 to’o 3 janeiru 2022, ho baze ba despaisu konjunta entre Komandante Jerál PNTL, Faustino da Costa no Xefe Estadu Maiór Jenerál F-FDTL, Tenente Jenerál Lere Anan Timur ho objetivu atu asegura seguransa ba komunidade sira iha ámbitu festa natal no tinan foun nian.

“Iha operasaun HABERAN laiha problema boot mosu, iha duni kazu ida de’it iha Kuluhun ne’ebe envolve membru PNTL ida no F-FDTL ida tanba kauza lanu, maibé bainhira ekipa operasaun Haberan simu informasaun responde kedas no lori individu rua ne’e ba sela hodi prosesa tuir dala legál” Xefe Departementu Justisa Komandu Jerál PNTL, Superintendente Xefe Polísia Agustinho Gomes, hateten ba Jornalista sira iha Kuartél Jerál PNTL-Caicoli, tersa ne’e.

Superintendente Xefe Polisia ne’e akresenta atividade ne’ebé halo iha terreñu liuhosi patrullamentu, check point no responde kazu balu ne’ebe maka involve membru militar F-FDTL no PNTL.

Tuir nian atividade ne’e konsege atinje duni apoia operasaun prevensaun infrasaun disiplina hosi membru instituisaun rua ne’e no hatudu duni disiplina durante períodu Natál no Tinan Foun.

Nune’e, Ekipa konjunta PNTL liuhosi Departamentu Justisa no F-FDTL liuhosi Unidade Polisia Militar ensera operasaun disiplina konjunta ho kodigu “HABERAN” ne’ebe mak instituisaun rua ne’e hala’o durante semana tolu (3) iha kapital Dili hodi prevene infrasaun disiplina.

“Operasaun ne’e, ita termina ona, tanba ne’e ha’u lori Departamnetu Justisa nia naran hato’o agradesementu no parabéns ba membru militár F-FDTL no membru Departamentu Justisa PNTL ne’ebé mak involve diretamente iha operasaun HABERAN,”Nia agradese.

Eis Komandante munisípiu Manufahi ne’e kontinua enkoraja membru sira atu servisu hanesan  erói nasionál sira atu tenke hamrik metin asegura segurana ba povu no Estadu. 

Iha biban hanesan, Komandante Interinu Unidade Polisia Militár, Kapitaun Francisco Xavier dos Reis Neto, mós hato’o agradesementu ba membru Polisia militar (F-FDTL) no membru Polisia Profost (PNTL) ne’ebé serbisu iha ámbitu loron boot ho rezultadu ne’ebé di’ak tebes.

“Ita nia susesu la’ós ita mak avalia, maibé povu sira mak bele avalia ida ne’ebé di’ak no ida ne’ebe aat. Ita labele sura ita nia kolen tanba ita nia kolen la sura no la tetu ho ita nia heroi sira. Nuudar membru instituisaun rua tenke hamrik iha sira nia fatin hodi servi ba povu no nasaun,” Kapitaun ne’e fó  enkoraja.

Nune’e, Kapitaun Francisco Xavier husu ba membru PNTL-F-FDTL atu koopera malu no haree malu hanesan timór-oan hodi garante seguransa ba povu no nasaun.

Jornalista  : Natalino Costa

Editór         : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here