Médiku sira iha Sentru Saude Vera-Cruz halo hela atendementu ba labarik sira ne’ebé hetan moras dengue. Imajen Tatoli/Antonio Dasiparu

DILI, 10 fevereiru 2022 (TATOLI)— Ministériu Saúde (MS) kontiua enkoraja komunidade iha kapitál Dili no munisípiu sira seluk atu hamoos uma-ninin no lixu hodi prevene an hosi surtu dengue.

“Apela ba autoridade munisipál no autoridade lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dala ida. Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin,” refere nota ne’ebé Agência TATOLI asesu, kinta ne’e.

Notísia relevante: Dengue ‘domina’ kapitál Dili no hamate labarik na’in-29

Tanba tuir dadus hosi Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú fulan-janeiru to’o horisehik pasiente dengue sa’e ba 1.861, hosi númeru ne’e na’in-29 mak mate.

Maioria kazu ne’e deteta husi Munisípiu Dili ho totál 1.208, Baucau 82, Manatuto 120, Covalima 66, Ermera ho kazu 85, Manufahi 80, Viqueque 44, Ainaro 24, Liquiça 32, Aileu 37 no Bobonaro 30 Lautem 39 no RAEOA tolu.

Munisípiu Dili nafatin rejista kazu ne’ebe a’as iha primeira semana to’o sesta semana fulan fevereiru 2022, ho totál kazu 1.208 kazu. Nune’e haree ba kada loron kazu aumenta bebeik husi Munisípiu Dili.

To’o ohin loron hahú semana dahuluk fulan janeiru tinan 2022, kazu dengue hosi postu administrativu Dom Alexo iha 644, Cristo-Rei 243, Vera-Cruz 140 no Nain Feto 147.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 273, Klínika Fatumeta 161, sentru saúde Comoro 348, sentru saúde Vera-Cruz 55, Sentru Saúde Formoza 189, Sentru Saúde Becora 129, Klínika Madre Eliza na’in-ida, Sentru Saúde Atauro 11, Sentru Saúde Metinaro 19, Klínika Bairru-Pité 19 no Klínika Motael na’in-rua.

Tanba ne’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e, liman-ain no sikun moras hodi bele hetan atendimentu husi profisionál saúde sira.

Kazu kamaan ba Tasi Tolu

Entertantu, Ministru Saúde, Bonifacio Maucoli dos Reis, informa ba oin kazu dengue kamaan sei transfere ba halo tratamentu iha Tasi-Tolu.

“Daudaun tékniku sira prepara kondisaun artu pasiente dengue kaman ba hotu halo tratamentu iha Tasi-Tolu. Ita sei halo jestaun rekursu umanus atu fahe ba Tasi-Tolu Entaun ba oin mak ita detekta kazu dengue haemorrhagic fever/DHF  no dengue shock syndrome (DSS) halo tratamentu iha Hospitál Nasionál Guido Valadares (HNGV),” Vise Ministru ne’e afirma.

Vise-Ministru Saúde, Bonifácio Maucoli dos Reis. Imajen Tatoli/Francisco Sony

Razaun transfere pasiente dengue, Governante ne’e dehan tanba espasu HNGV la sufisiente ona to’o pasiente balun simu tratamentu médiku iha koridór.

“Ha’u akonpaña no haree iha HNGV ne’e labarik sira  la’ós maioria kazu dengue,  maibé   balun ho moras sira seluk no médiku sira nafatin fó atendimentu ne’ebé mak di’ak,” nia akresenta.

Iha biban hanesan, Diretór Klínika HNGV, Marcelino Correira hateten, sentru izolamentu Tasi-Tolu sai fatin alternativu   ida atu halo transferénsia pasiente dengue kmaan ne’ebé mak baixa iha HNGV 

“Ita haree espasu HNGV ne’e atu baixa dengue mós susar tanba ita la’ós simu pasiente dengue de’it, maibé ita simu pasiente sira ne’ebé mak ho moras oin-oin. Ida ne’e mak difikulta ba ita-nia fatin entaun ita aumenta tama kama 75 ba bebé nian atu monta iha HNGV atu responde  ba kazu ne’ebé mak iha liuliu ba kazu dengue ne’ebé mak grave,” nia akresenta.

Tanba laiha ona espasu, HNGV mós utiliza fatin Unidade Kardiaku hodi halo atendimentu  ba pasiente dengue.

Kona-ba rekursu umanu, Diretór ne’e dehan, tempu badak Minsitériu Saúde apoia tan médiku 30 hodi apoia HNGV hodi fó atendimentu ba pasiente dengue.

“Ami ko’alia ona ho Ministériu Saúde halo ona preparasaun no fó treinamentu báziku ba sira atu mai fo tratamentu ba pasiente dengue. Tanba ita sei koloka sira iha pediátria no mós sala emerjénsia hodi reforsa atendimentu ba komunidade sira,” nia akresenta.

Notísia relevante: Pasiente dengue na’in-700 konsege rekuperadu iha Vera-Cruz

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here