Ekipa CVTL halo fomigasaun ba atuasaun kazu dengue iha bairo Becusi Sentral, loron kinta (20/01). Imajen Tatoli/Francisco Sony

DILI, 07 fevereiru 2022 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Jerónimo, hateten atu prevene dengue iha Timor-Leste Ministéiru Saúde daudaun ne’e halo fumigasaun ativu ka rutina iha bairu sira iha kapitál Dili.

Notísia Relevante: Ministra Odete: “Governu esforsu hela atu ‘kombate’ moras dengue”

“Fumigasaun iha Dili laran ne’ebé mak Ministéiru Saúde hala’o, ohin (07 fevereiru) sei hala’o iha Vera Cruz no Mascarinhas iha dadeer ho lorokraik no aban iha Madohi Don Aleixo. Nune’e, atuasaun la’o durante ne’e kontinua nafatin iha Dili laran to’o ramata iha fatin sira hodi prevene dengue,” Ministru ne’e informa, iha sala plenária, Parlamentu Nasionál, segunda ne’e.

Tuir Dirasaun Nasionál Saúde Públika liu-liu Departamentu Vijilansia Epidemolojia iha Ministériu Saúde, hahú fulan-janeiru to’o iha 06 fevereiru ne’e pasiente dengue sa’e ba 1.604, no hosi númeru ne’e na’in-27 mak mate.

Maioria kazu ne’e deteta iha munisípiu Dili ho totál 1.068, Baucau 69, Manatuto 104, Covalima 58, Ermera ho kazu 77, Manufahi 69, Viqueque 28, Ainaro 22, Liquiça 32, Aileu 24 no Bobonaro 26, Lautém 24 no RAEOA tolu.

Munisípiu Dili nafatin rejista kazu ne’ebé aas iha primeira semana to’o sesta semana fulan fevereiru 2022, ho totál kazu 1.068 kazu. Nune’e, haree ba kada loron kazu aumenta beibeik hosi Munisípiu Dili.

To’o horisehik hahú semana dahuluk fulan janeiru tinan 2022, kazu dengue hosi postu administrativu Dom Alexo iha 565, Cristo-Rei 218, Vera-Cruz 124 no Na’in Feto 132.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 249, Klínika Fatumeta 132, sentru saúde Comoro 310, sentru saúde Vera-Cruz 50, sentru saúde Formoza 170, sentru saúde Becora 113 klinika madre eliza ida, sentru saúde Atauro 11, sentru saúde Metinaro 16, klínika Bairru-Pité 13 no klínika Motael na’in-rua.

Nune’e, Ministériu Saúde kontinua apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu hosi profisionál saúde sira.

Apela mós autoridade munisipál no autoridade lokál atu bele orienta komunidade halo limpeza jerál iha suku no bairru sira liliu fase tanke, bidon ka balde tau bee semana ida dala ida.

Apela atu hamoos sasán hanesan roda aat, vazu ai-funan atu susuk labele tau tolun, haloot roupa ho di’ak iha uma laran, uza roupa ne’ebé liman naruk karik toba iha tempu loron, uza aimoruk hanesan repelente ka autan, uza moskiteiru karik toba iha tempu loron no soe lixu iha nia fatin.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here