Primeiru Ministru, aur Matan Ruak. Imajen TATOLI/Francisco Sony

DILI, 07 fevereiru 2022 (TATOLI)–Primeiru-Ministru (PM), Taur Matan Ruak, preokupa ho progresu rekuperasaun estragu infraestrutura impaktu dezastre naturál, tanba haree ba ezekusaun iha verba fundu infraestrutura atinje de’it 26% iha tinan kotuk.

“Ministériu Planu Ordenamentu (MPO) no Ministériu Obra Públika (MOP) dada malu tun sa’e, Ajénsia Dezenvolvimentu Nasionál (ADN) no Komisaun Nasionál Aprovizionamentu (CNA, sigla portugés) tama tan. Dezastre naturál tinan 2020 seidauk rekupera hotu, tinan 2021 mós seidauk. Iha reuniaun Konsellu Ministru ha’u hateten katak, ha’u tauk ita-nia rapidéz laiha no demora, estuda, dada tun dada-sa’e, to’o ita husik hela infraestrutura ida piór liu fali kuandu ita tama,” PM hateten iha ámbitu enkontru ho diretór jerál, kargu ekiparadu, autoridade administradór munisipál no postu administrativu sira, iha auditorium Ministériu Finansa (MF), Aitarak-laran, segunda ne’e.

Notísia relevante: Governu analiza dezafiu implementasaun programa rekuperasaun infraestrutura kauza dezastre naturál

Nune’e, Xefe Ezekutivu husu ba ministériu relevante atu tau-matan hodi aselera rekupera estragu sira.

“Asuntu sira ne’ebé presiza atu rezolve, labele rai ba aban. Importante metedolojia serbisu ne’e tenki iha supervizaun no planu, ne’e importante. Ita tenki iha regra, disiplina no tempu, tanba ema dehan tempu ne’e osan no tempu ne’e vida, minutu ida lakon ita lakon ita-nia vida, lakon osan, entaun ne’e dezafiu ida tan, rekuperasaun infraestrutura danifikadu no projetu sira ne’ebé iha, la’o lala’o, entaun tenki tau-matan ba ida-ne’e,” PM dehan.

Enkuantu, Ministériu Obra Públika identifika estragu sira durante dezastre naturál iha loron 04 abríl 2021 hamutuk 117 iha teritóriu laran tomak kompostu hosi estragu simples 40 no estragu komplexu 77, ho estimasaun kustu pur volta millaun $245.

Antes ne’e, Konsellu Administrasaun Fundu Infraestrutura (KAFI) deside rekupera imediata projetu ualu, ne’ebé hetan estragu tanba inundasaun ne’ebé akontese iha 04 abríl 2021.

Infraestrutura estrada ne’ebé konsege rekupera ona mak Embaixada Japaun oin, enkuantu seluk iha faze konkursu públiku iha CNA.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here