Uma-lisan sira iha Postu Administrativu Laga, Munisípiu Baucau. Imajen/Foti hosi Globtroter.pl

DILI, 04 fevereiru 2022 (TATOLI)—Sekretariu Estadu Arte no Kultura (SEAK), liuhosi Diresaun Nasionál Patrimóniu Kulturál (DNPC,sigla portugés), durante fulan-fevereiru 2022, sei halo prosesu verifikasaun ba uma lisaun hamutuk 120 iha Timor-Leste hodi prezerva no dezenvolve iha futuru.

“Tuir planu, ami sei halo verifikasaun ba uma lisan 120 iha fevereiru tinan ne’e,” Diretór Nasionál Patrimóniu Kulturál, Gil Paulino S. Oliveira, informa ba Agência Tatoli, iha nia knaar-fatin, Avenida Portugál, Díli, sesta ne’e.

Notísia Relevante :SEAK seidauk fó apoia ba uma tradisionál Leiaval

Tuir loloos prosesu verifikasaun ne’e hala’o ona iha loron 17 fulan-janeiru 2022, maibé kestaun tékniku tenki adia, tanba SEAK sei halo konkursu ba kompañia sira atu forñese kombustivel durante prosesu ne’e la’o.

“Ami-nia programa ne’e muda fali ba fevereiru nia laran bainhira anúnsia kompañia ne’ebé manan hodi forñese mina, hafoin ne’e dirasaun foin bele tun ba terrenu hodi halo verifikasaun,” nia hateten.

Diresaun Nasionál Patrimóniu Kulturál, fahe ona ekipa haat maka sei bá hala’o prosesu verifikasaun ne’e.

Ekipa dahuluk,  sei toma konta husi rejiãun ne’ebe kobre Munisípiu Baucau, Viqueque, Lautém no Manatutu. Ekipa daruak, sei  hala’o iha Aileu, Ainaro, Manufahi.

No ekipa datoluk, sei destaka bá iha munisípiu Ermera, Liquiça, Bobonaro no Covalima. Nune’e mós ekipa ikusliu sei bá iha Rejiaun Administratitva Espesiál Oé-Cusse Ambeno (RAEOA).

“Maibé, iha tinan ne’e Oe-cusse nia proposta to’o agora seidauk tama, entaun ita rezerva de’it karik sira-nia proposta sei tama iha sedu, automátikamente ekipa ida tenke desloka bá iha ne’ebá hodi halo verifikasaun molok tama ba prosesu apoia, ne’ebé, dadaun ne’e ekipa tolu mak fiksu ona,” nia hatutan.

Kada ekipa sei desloka bá munisípiu no RAEOA durante loron neen hodi halo prosesu verifikasaun ba uma lisan sira, tanba kada munisípiu sei okupa tempu loron rua.

Nia dehan, SEAK aloka orsamentu hamutuk $3.000 hodi fasilita akomodasaun ba ekipa hodi halo servisu.

Notísia Relevante :SEAK sei halo verifikasaun ba uma lisan 120 iha territóriu nasionál

Jornalista : Nelia Fernandes

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here