Ahi han uma-tradisionál Laiaval iha Lautém, sábadu (11/12). Imajen/Espesiál.

DILI, 11 janeiru 2022 (TATOLI)—Diretór Nasionál Patrimóniu Kulturál, Gil Paulino S. Oliveira, informa Sekretaria Estadu Arte no Kultura (SEAK), liuhosi Dirasaun Nasionál Patrimóniu Kulturál seidauk bele fó apoia ba uma tradisionál Leiaval ne’ebé ahihan hodi pendente proposta, tanba sei iha asuntu internál entre Lautém-oan sira.

Ahi han uma-tradisionál Laiaval iha Lautém, sábadu (11/12). Imajen/Espesiál.

“Iha momentu sira hatama proposta iha 2021, SEAK mós tau konsiderasaun, hodi aloka osan uitoan atu reabilita uma lisan Leiaval, maibé bainhira ami prepara tiha kontratu no ekipa painél juri lori kontratu atu ba asina iha Lautém, administradór Lautém rasik hateten uma lisan ne’e seidauk bele autoriza komisaun organizadora asina atu hetan apoia tanba sei iha asuntu internál ida entre Lautém-oan sira atu rezolve. Tanba ne’e ikus mai proposta ne’e pendente no na’in mós la asina,” Gil Paulino S. Oliveira, hateten ba Agência Tatoli iha nia knar fatin, Avenida Portugál, Dili, tersa ne’e.

Tanba ne’e, nia informa, SEAK kontaktu ba komisaun organizadóra ne’ebé hatama proposta ne’e atu sira ba buka Administradór Lautám atu ko’alia tui ba malu, nune’e SEAK hein rezultadu konabá autorizasaun hosi admnsitradór atu bele asina ka lae, maibé sira la fó resposta to’o ohin loron.

Notísia RelevanteSEAK simu ona informasaun ahi-han uma-tradisionál Leiaval iha Lautém

SEAK mós tenke rona autoridade lokál sira, tanba sira sai hanesan parseriu ka liman ain Governu sentrál liu-liu hosi Sekretaria Estadu Arte no Kultura nian, atu ajuda halo kontrolu ba utilizasaun orsamentu sira-ne’e ba komunidade iha baze.

Tuir SEAK nia polítika katak orsamentu ne’ebé atu apoia uma lisan ne’e, uma lisan ne’ebé na’in ka jerasaun sira iha tinantinan sempre halo serimónia rituál, maibé uma tradisionál iha Lautém ne’e hanesan uma reprezentantivu, tanba nia hanesan simbólu ida ne’ebé harii iha ne’ebá katak reprezenta Lautém hotuhotu.

“Tuir lolos ita atu apoia ne’e foku ba uma lisan ne’ebé iha atividade vivo, katak apoia nia konstrusaun hotu iha tinantinan nia halo nafatin serimónia rituál halibur nia jerasaun sira hodi husu matak malirin. Maibé, uma lisan iha Lautém ne’e hanesan reprezentativu de’it, atu ko’alia konaba kategória apoia ida-ne’e tuir loloos nia labele tama apoia, tanba nia hanesan reprezenta. Tanba, polítika ida atu apoia agora ne’e, nia trajetu halai liubá uma lulik sira-ne’ebé komunidade sira prezerva, tanba tinantinan sira halo hela atividade kulturál ne’e,” nia afirma.

Entretantu, uma tradisionál Leiaval iha aldeia Sentrál, suku Fuiloro, postu administrativu Lospalos, Munisípiu Lautém ne’e ahihan iha loron sabádu (11/12) maizumenus tuku 10h00-resin.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here